Qashqadaryo viloyat IIB boshlig‘i Shuhrat Sotvoldiyevga ko‘ra, Qarshi shahridagi mavjud 64 ta mahallaning 34 foizi jinoyatchilik sodir etilishiga qarab, “qizil” toifaga kirsa, 42 foizi “sariq” toifadagi mahallalar hisoblanadi. Bu haqda masʼul kriminogen vaziyat sektorlar kesimida Xalq deputatlari shahar kengashi deputatlari ishtirokida o‘tkazilgan muhokama yig‘ilishida gapirgan.
Taʼkidlanishicha, muhokama yig‘ilishida viloyat IIB boshlig‘i, viloyat sudi, viloyat prokuraturasi rahbarlari ishtirok etgan bo‘lib, unda 2023-yilning to‘rt oyida sodir etilgan jinoyatchilik masalalari muhokama qilingan.
“Tadbirni Qashqadaryo viloyat IIB boshlig‘i polkovnik Shuhrat Sotvoldiyev ochib, Qarshi shahar hududida joriy yilning to‘rt oyi davomida jamoat xavfsizligini taʼminlash, kriminogen vaziyat — jinoyatchilikning oldini olish va ro‘y berganlarini fosh etish, qidiruvdagi shaxslarni topib, jinoyatga jazo muqarrarligini taʼminlash bo‘yicha amalga oshirilgan ishlar va bu borada yo‘l qo‘yilgan kamchiliklarni atroflicha tahlil etdi.
Tahlillarga ko‘ra, Qarshi shahrida joriy yilning to‘rt oyida umumiy jinoyatlar fuqarolar o‘rtasida va oila turmush doirasidagi o‘zaro janjallar natijasida yuz bergan. Aynan shu turdagi jinoyatlarning sodir etilganligiga qarab, Qarshi shahridagi 64 ta mahallalardan 34,4 foizi ‘qizil’ va 42,2 foizi ‘sariq’ toifadagi mahallalar ro‘yxatida turgani achinarli holatligi gapirildi. ‘Qizil’ toifadagi mahallalar birinchi sektorda 6 ta, ikkinchi sektorda 4 ta, uchinchi sektorda 7 ta, to‘rtinchi sektorda 5 tani tashkil etishi ochiqlandi”, — deyiladi viloyat IIB axborot xizmati tarqatgan maʼlumotda.
Yig‘ilishda aytilishicha, mazkur holatlar, oila-turmush munosabatlari doirasidagi jinoyatlarning oldini olish bo‘yicha mahallalardagi “Beshlik” tizimi hamda boshqa tegishli mutasaddi tashkilotlar vakillari tomonidan yetarli darajada profilaktik ishlar amalga oshirilmaganligini ko‘rsatmoqda.
“Buning uchun jinoyatchilik va huquqbuzarliklarning oldini olish, unga qarshi kurashish, jamoat xavfsizligini taʼminlash maqsadida har payshanba kuni viloyatdagi barcha tashkilot, muassasa va idoralarda ‘Huquqbuzarliklar profilaktikasi kuni’ tadbirlari o‘tkazib borilishi belgilab berilgan. Shu sababli, ‘Huquqbuzarliklar profilaktikasi kuni’ tadbirini samarali olib borish, amalga oshirilgan ishlarni tahlil etib, o‘tkazilayotgan ‘Xavfsiz hudud’, ‘Turmush’, ‘O‘smir’ va boshqa profilaktik tadbirlarda barcha mutasaddi tashkilotlar va huquqni muhofaza qiluvchi organlar hamjihatlikda ish tashkil etib, o‘zaro hamkorlikni taʼminlashi zarurligi ishtirokchilarga uqtirildi.
Shahar hududida sodir etilgan og‘ir turdagi qotillik, tan jarohati yetkazish va bezorilik bilan bog‘liq, ishga va o‘qishga kiritib qo‘yish hamda uy-joy olib berish bilan bog‘liq holatlar firibgarlik, kiber makonda sodir etilayotgan jinoyatlarning oldini olish maqsadida mahalla va tashkilotlarda profilaktik ishlarni kuchaytirish, OAVlarda ko‘rsatuvlar orqali jinoyatlarning salbiy oqibatlarini targ‘ib etish lozimligi aytildi”, — deydi viloyat IIB axborot xizmati rahbari Javlon Baxtiyev.
Qo‘shimcha qilinishicha, Qarshidagi jinoyatlarning barchasi o‘zaro oilaviy kelishmovchiliklar va nizolar orqali kelib chiqqan.
“Kelgusida, oila-turmush doirasidagi jinoyatlarning oldini olish maqsadida nizoli oilalar, huquqbuzarlik sodir etib maʼmuriy javobgarlikka tortilgan shaxslarning ro‘yxatlarini shakllantirib, ular bilan keng jamoatchilik vakillari ishtirokida profilaktik tadbirlarni kuchaytirib, ushbu oilalardagi ayollarga ‘Himoya orderi’ni berish, muntazam ravishda spirtli ichimlik oqibatida huquqbuzarlik sodir etilayotgan oilalarda ijtimoiy-maʼnaviy, tarbiyaviy muhitni va sog‘lom turmush tarzini yaratishda ularga huquqiy maslahatlar, ijtimoiy yordamlar ko‘rsatish va ish bilan band bo‘lmaganlarini ish bilan taʼminlash choralarini ko‘rish bugungi kun talabi. Xulosa qilib aytganda, jinoyatlarni barvaqt aniqlab oldini olish va huquqbuzarliklar profilaktikasi sohasida ishlarni tizimli tashkil etish borasida sektor rahbarlari oldiga aniq vazifalar qo‘yildi. Bu borada Yo‘l xaritasi tuzib, amalga oshirish majburiyati yuklandi”, — deydi masʼul.
Izoh (0)