Ilon Mask Mo‘g‘uliston bilan hamkorlik qilmoqchi. U mamlakat bosh vaziri bilan muhokama o‘tkazdi

Tesla asoschisi Ilon Mask va Mo‘g‘uliston bosh vaziri Luvsannamsrayn Oyuun-Erdene sarmoyalar va Amerika kompaniyasining mamlakatdagi faoliyatini kengaytirish masalalarini muhokama qildi.

Suhbat videoaloqa orqali bo‘lib o‘tdi, bu haqda Mo‘g‘uliston hukumati matbuot xizmati xabar qildi.

Ma’lum qilinishicha, Mask va Oyuun-Erdene Mo‘g‘ulistonda elektromobillar uchun akkumulyatorlar ishlab chiqaradigan zavod qurish imkoniyatlarini muhokama qilgan.

Shuningdek, bunday akkumulyatorlarda qo‘llanadigan va Mo‘g‘ulistonda faol qazib olinayotgan mis va nodir yer elementlaridan kengroq foydalanishni birgalikda o‘rganish imkoniyatlari ko‘rib chiqildi. Bundan tashqari, ular Mo‘g‘uliston IT-mutaxassislari uchun o‘quv dasturini ishga tushirish masalasini muhokama qildilar.

Oyuun-Erdene elektr transport vositalari va boshqa yashil texnologiyalarning tarqalishini qo‘llab-quvvatlashini va o‘z yurtdoshlarini elektr transport vositalaridan foydalanishga undashini aytdi. Amerika ommaviy axborot vositalarining yozishicha, suhbatdoshlar Maskning yana bir loyihasi bo‘lgan Starlink sun’iy yo‘ldosh internetini Mo‘g‘ulistonda joylashtirish masalasini ham muhokama qilgan.