Farg‘ona viloyati Oltiariq tumanida italiyalik ayol YTH oqibatida vafot etdi. Bu haqda IIV axborot xizmati “Daryo”ga xabar berdi.
Unga ko‘ra, hodisa 2-iyun kuni Oltiariq tumani “Azimobod” mahallasini kesib o‘tuvchi 4P-148A Bog‘dod—Oltiariq yo‘lining 2-kilometrida sodir bo‘lgan. Nexia-2 haydovchisi — Bag‘dod viloyatida yashovchi, 2002-yilda tug‘ilgan A.A. velosiped haydab ketayotgan 1956-yilda tug‘ilgan A.U.ni (chet el fuqarosi, ayol) urib yuborgan.
Oqibatda jabrlanuvchi turli tan jarohatlari bilan kasalxonaga yotqizilgan. Biroq ko‘rsatilgan tibbiy yordamga qaramay vafot etgan.
Holat yuzasidan Farg‘ona viloyati IIB tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Tergov harakatlari davom etmoqda.
Izoh (0)