“Vagner” rahbari Yevgeniy Prigojin Rossiya Belgorod viloyatida dushmanni yo‘q qilish operatsiyasi niqobi ostida o‘z hududiga yadro quroli bilan zarba berishi mumkinligini aytdi.

Prigojinning so‘zlariga ko‘ra, hozirgi vaziyat bunday zarbaga tayyorgarlik ko‘rishga juda o‘xshaydi.

“Qo‘rqamanki, ular o‘z hududlariga qandaydir yadro bombasini tashlashi mumkin. Biz Belgorod viloyatida orqaga chekinayotganimiz va ularga oldinga siljishlariga imkon berganimiz sababi shu emasmi, begona hududga yadro qurolini tashlash qo‘rqinchli, lekin o‘zimiznikiga tashlaymiz. Bu bizning qanday ruhiy kasal ekanimizni ko‘rsatadi”, — deydi Prigojin.

U Rossiyada Belgorod viloyatiga taktik yadro quroli bilan zarba berish qishloqlardan birida dushmanni yo‘q qilish operatsiyasi sifatida niqoblanishi mumkinligini aytdi. Biroq, u Mudofaa vazirligining beparvoligiga ishora qilib, Rossiya yadrosining xizmat ko‘rsatish qobiliyatiga shubha bildirdi.

Bundan tashqari, “Vagner” rahbari Rossiya mudofaa vaziri Sergey Shoyguga Belgorod viloyatini ozod qilish uchun ikki hafta vaqt berdi, aks holda “Vagner” u yerga borishini ta’kidladi. Biroq, Prigojin yollanma askarlar “yolg‘iz o‘lmaydi”, balki u erda muntazam qo‘shinlar ham ular bilan jang qilishini aytdi.