Britaniyaning MI6 razvedkasi rahbari Richard Mur Twitter’dagi sahifasida Turkiyaning yangi tashqi ishlar vazirini tabriklash uchun adashib feyk akkauntni belgiladi.

Turkiyaning qayta saylangan prezidenti Rajab Toyyib Erdo‘g‘on yakshanbaga o‘tar kechasi mamlakatning yangi vazirlar mahkamasi tarkibini e’lon qildi, unda avvalgi tarkibdagi vazirlar deyarli yo‘q.

Turkiya tashqi ishlar vazirligining yangi rahbari etib avval Milliy razvedka tashkiloti rahbari lavozimini egallab kelgan 55 yoshli Hakan Fidan tayinlandi. Fidan 9 yildan ortiq vazirlik qilgan va hozirda Antaliya viloyatidan deputat etib saylangan Mevlut Chavusho‘g‘li o‘rnini egalladi.

Mur profilida parodiya akkaunt ekanligi yozib qo‘yilgan akkauntni belgilab, “Ko‘p yillik do‘stim va hamkasbimga yangi lavozimida muvaffaqiyatlar tilayman. Vazirga omad tilayman!”, — deb yozgan.

Xabar berilishicha, Turkiyaning yangi TIV rahbari Hakan Fidanning hozirda ijtimoiy tarmoqda rasmiy akkaunti yo‘q.