AQSH prezidenti Jo Bayden mamlakatga defoltdan qochish imkonini beruvchi AQSH qarzining chegarasini oshirish haqidagi qonun loyihasini imzoladi. Bu haqda Oq uy ma’lum qildi.
“3-iyun, shanba kuni prezident davlat qarzi chegarasini 2025-yil 1-yanvargacha to‘xtatib qo‘yuvchi 2023-yilgi Fiskal javobgarlik to‘g‘risidagi qonunni imzoladi”, — deyiladi AQSH ma’muriyati bayonotida.
Bundan tashqari, AQSH prezidenti Kongress rahbarlariga ushbu hujjatni qabul qilishda hamkorlik qilganliklari uchun ham minnatdorchilik bildirdi.
29-may kuni Oq uy AQSH prezidenti Jo Bayden va Vakillar palatasi spikeri Kevin Makkarti davlat qarzining chegarasi bo‘yicha yakuniy kelishuvga erishganini ma’lum qildi. Bitim davlat qarzini 2025-yilgacha oshirishni nazarda tutadi.
Bitimning markaziy qismi ikki yillik budjet shartnomasidir. U mudofaa va faxriylar uchun xarajatlarni oshirish imkoniyati bilan 2024-yil uchun xarajatlarni odatdagidek qoldirishni nazarda tutadi. 2025-yilda xarajatlar darajasi 1 foizga oshiriladi.