Hujumchi Karim Benzema mavsum yakunida “Real”ni tark etmaydi.
Marca nashrining xabar qilishicha, Benzema yana bir mavsum Madrid jamoasida qolish qaroriga kelgan. U amaldagi shartnomasining oxirigacha klubda qolmoqchi.
Avvalroq Saudiya Arabistonining “Al-Ittihod” klubi 35 yoshli futbolchiga 2 yillik shartnoma uchun 200 million yevro maosh taklif qilayotgani va futbolchi buni qabul qilishi mumkinligi haqida xabar qilingandi.
Qayd etilishicha, fransiyalik futbolchi arablarga bu taklifdan xursand ekanligi, biroq uni rad etishini aytgan.
Karim yana bir mavsum Yevropada ko‘tarinki mavsum o‘tkazishiga ishonmoqda va saudiyaliklarning taklifi 2024-yilda ham o‘z kuchida qolishiga umid qilyapti.
Benzemaning “Real” bilan amaldagi shartnomasi 2024-yilning yoziga qadar mo‘ljallangan. Ayrim OAVga ko‘ra, arablar Benzemaga katta maosh taklif qilgani bilan transfer uchun “Real”ga pul to‘lashni istamagan. Fransuz esa jamoasini qiyin ahvolga solib qo‘ymaslik uchun foydali taklifdan voz kechgan.
Fransiyalik forvardning bu yozda ketishi “Real”ning yozgi transfer oynasi uchun rejalarini butkul o‘zgartirib yuborardi. Klubning rejasida bu yozda top-hujumchi olib kelish varianti yo‘q edi.
Fransuz joriy mavsum “qaymoqranglilar” safida La Ligada 23 ta o‘yinda ishtirok etib, 18 ta gol va 3 ta golli uzatmaga mualliflik qildi.
Izoh (0)