Jahon sog‘liqni saqlash tashkiloti (JSST) 2022-yil fevralda Rossiyaning keng ko‘lamli bosqini boshlanganidan keyin Ukrainada sog‘liqni saqlash tizimiga 1 004 ta hujum uyushtirilganini qayd etdi. Bu gumanitar favqulodda vaziyatda tashkilot tomonidan kuzatilgan eng yuqori ko‘rsatkich.
JSST ta’kidlashicha, keng ko‘lamli bosqin boshlanganidan beri 15 oy ichida tashkilot tasdiqlagan 1 004 ta hujumda 101 kishi, jumladan, tibbiyot xodimlari va bemorlar halok bo‘lgan, ko‘plab odamlar jarohatlangan.
Tashkilot ma’lumotlariga ko‘ra, hujumlar paytida 896 ta kasalxona zarar ko‘rgan, 273 ta hujum ta’minotga, 121 ta hujum transportga, 72 ta hujum xodimlarga va 27 ta hujum bemorlarga zarar yetkazgan.
Shuningdek, tibbiy xizmat ko‘rsatuvchi provayderlar, ta’minot zanjirlari, jihozlar va transport, shu jumladan tez yordam mashinalari ham nishonga olingan.
Eng ko‘p zarar ko‘rgan hududlardagi, jumladan Xerson, Xarkov, Zaporojye va Donetsk viloyatlaridagi sog‘liqni saqlash muassasalari kiradi. Shu bilan birga, ushbu hududlardagi tibbiyot muassasalarining yuqori foizi, zarar ko‘rganiga qaramay, o‘z faoliyatini davom ettirmoqda.
JSST ma’lumotlariga ko‘ra, xodimlar va tibbiy asbob-uskunalar yetishmasligi tufayli kimyoterapiya va mammografiya kabi ixtisoslashtirilgan xizmatlarni ko‘rsatishda jiddiy muammolar bor. Ba’zi hududlarda yuqori malakali akusherlik yordamini ko‘rsatishda qiyinchiliklar mavjud.
“Urushdan vayron bo‘lgan hududlarda birlamchi tibbiy-sanitariya yordami keng qo‘llanishiga qaramay, so‘nggi olti oy ichida sog‘liqni saqlash xarajatlari oshdi. JSST tomonidan o‘tkazilgan so‘rovlar shuni ko‘rsatdiki, aholining deyarli uchdan bir qismi maʼlum tibbiy xizmatlarni sotib olishda qiynalmoqda”, — dedi tashkilot.
JSST shuningdek, 2022-yil 24-fevraldan beri tashkilot butun Ukraina bo‘ylab deyarli 9 million kishiga yordam ko‘rsatganini ma’lum qildi.
Izoh (0)