AQSHdagi kutubxonadan qariyb 100 yil oldin olingan kitob qaytarildi

Kitob Kaliforniyadagi kutubxonaga ijaraga olingan vaqtdan 96 yil o‘tib qaytarilgan, deb yozmoqda “Pravila jizni” nashri.

Yaqinda amerikalik tarixchi Benson Lossingning 1881-yilda chop etilgan “Amerika Qo‘shma Shtatlari tarixi” kitobi Muqaddas Yelena jamoat kutubxonasiga keltirilgan. Ma’lum bo‘lishicha, o‘quvchi ushbu kitobni 1927-yilning 21-fevralida Kaliforniya kutubxonasiga qaytarishi kerak bo‘lgan.

Kitobning ichida kutubxonaning asl varaqasi ham saqlanib qolgan, unga “bu kitob ikki hafta ichida qaytarilishi kerak” va “kitobga yetkazilgan zarar qoplanishi zarur” deb yozilgan.

“Amerika Qo‘shma Shtatlari tarixi” kitobini aniq kim olib kelgani noma’lum, chunki uni old stolda qoldirgan inson ketishdan oldin o‘zi haqida hech qanday ma’lumot bermagan. Hozir kutubxona xodimlari bu kitob qanday qilib o‘sha insonning qo‘liga tushib qolganini aniqlash maqsadida uni qidirmoqda.

Agar kechiktirilgan kitob jarimasi o‘z o‘rnida qolsa, erkakdan 1756 dollar to‘lash talab qilinishi mumkin edi, biroq jarima 2019-yilda bekor qilingan.