Hindiston shimolida avtobus daraga qulashi oqibatida kamida 10 kishi halok bo‘ldi, 55 kishi yaralandi. Bu haqda ANI nashri xabar berdi.
Avtobus Amritsar shahridan Katraga ziyoratchilarni olib ketayotgani edi. Baxtsiz hodisa manzildan taxminan 15 kilometr uzoqlikda yuz bergan.
Politsiya ma’lumotlariga ko‘ra, avtobusda kamida 65 kishi bo‘lgan, bu belgilangan sig‘imdan ortiq edi.
“Yo‘lovchilar soni ruxsat etilgan yuklamadan oshib ketgan, bu fakt tergov davomida tekshiriladi”, — deya politsiya vakili so‘zlaridan iqtibos keltirdi agentlik.
Avvalroq Pokistonda yo‘lovchi avtobusi ko‘prikka urilib, jarga qulagani haqida xabar berilgandi. Avtobus ichida 44 kishi tiriklayin yonib ketgan. Ispaniyada esa avtobus daryoga qulab tushgan, olti kishi halok bo‘lgan.
Shuningdek, Perudagi And tog‘larida avtobus jarlikka qulagani, oqibatda 15 kishi halok bo‘lgani haqida xabar berilgan.