Birlashgan Arab Amirliklarining 2022-yildagi yalpi ichki mahsuloti hajmi 503 milliard dollarni tashkil etgan bo‘lib, bu jon boshiga 47 ming 792 dollardan to‘g‘ri keladi, degani. BAA iqtisodiyoti bir yil avvalgiga qaraganda 3,8 foizga o‘sib, umumiy masshtabda Yaqin Sharq bo‘yicha beshinchi o‘rinda ketmoqda. Xo‘sh, jadal rivojlanish bosqichidagi ushbu davlatda oziq-ovqat mahsulotlarining narxlari qanaqa? O‘zbekiston bilan solishtirganda qimmatroqmi yoki fuqarolar kundalik iste’mol uchun Toshkentdagidan kamroq pul sarflaydimi? “Daryo” muxbiri shu savollarga javob izlab Ras al-Haymadagi har kunlik mahsulotlar narxlarini o‘rgandi.

Shahardagi eng katta savdo markazlaridan biridagi narxlar bilan tanishar ekanmiz, ro‘yxati shakllantiriladigan mahsulotlarni ikkita guruhga ajratdik. Biriga sabzavotlar, mevalar va poliz ekinlarini kiritsak, ikkinchi guruhdan go‘shtlar, o‘simliklardan olinadigan ikkilamchi mahsulotlar o‘rin oladi.

Mahsulotlarning taxminiy o‘rtacha narxi BAA dirhami hamda o‘zbek so‘mida ko‘rsatiladi (30-may sanasiga ko‘ra, 1 dirham 3109 so‘mni tashkil etadi). 

Oziq-ovqat mahsulotlari

Sut: 1 litri 12—14 dirham. So‘mda: 37000—43000 so‘mni tashkil etadi. Toshkentda: 12000—15000 so‘m.

Shakar: 1 kilogrammi sifatiga qarab 4,9—12,25 dirham. So‘mda: 15000—38000 so‘m. Toshkentda 11000—14000 so‘m.

Choy: 25 ta paketlisi 8—10 dirham. So‘mda: 25000—31000 so‘m. Toshkentda: 20 paketchali choy 25000—30000 so‘m.

Non: qadoqlangan holatda 3,8 dirham. So‘mda: 12000 so‘m. Toshkentda: 8000—10000 so‘m.

Tuxum: 15 donasi 11,6 dirham. So‘mda 36 ming so‘m. Toshkentda 15000—18000 so‘m.

Baliq: butun salmon balig‘i 49,95 dirham. So‘mda 155 ming so‘m. Toshkentda asosan sazan baliqlar sotiladi: 50000—60000 so‘m.

Mol go‘shti: 1 kilogrammi 38,45 dirham. So‘mda 120 ming so‘m. Toshkentda: 75000—80000 so‘m.

Tovuq go‘shti: 1 kilogrammi 23,45—30,45 dirham. So‘mda: 73000—95000 so‘m. Toshkentda 35000—45000 so‘m.

Yog‘: 1,5 litri 13—15 dirham. So‘mda 40000—46000 so‘m. Toshkentda: 22000—25000 so‘m.

Tuz: 200 grammi o‘rtacha 10—13 dirham. So‘mda: 31000—40000 so‘mgacha. Toshkentda: 5000 so‘m.

Meva va poliz ekinlari (kilogrammda)

Kartoshka: 2,50 dirham. So‘mda: 7800 so‘m. Toshkentda: 3000—6000 so‘m.

Guruch: naviga qarab 9,15 dirhamdan boshlanadi. So‘mda: 28000 so‘mdan. Toshkentda: 10000—30000 so‘m oralig‘ida.

Olma: 8,95 dirham. So‘mda: 28000 so‘m. Toshkentda: 15000—20000 so‘m.

Apelsin: 13,35 dirham. So‘mda: 41600 so‘m. Toshkentda: 18000—25000 so‘m.

Limon: 5,85 dirham. So‘mda: 18200 so‘m. Toshkentda: 15000—20000 so‘m.

Banan: 4,5 dirham. So‘mda: 14000 so‘m. Toshkentda: 18000—25000 so‘m.

Tarvuz: 2,9 dirham. So‘mda: 9000 so‘m. Toshkentda: 5000—7000 so‘m.

Qovun: 7—14,75 dirham. So‘mda: 22000—46000 so‘m. Toshkentda: 10000—17000 so‘m

Pomidor: 2,95 dirham. So‘mda: 9000 so‘m. Toshkentda: 7000—10000 so‘m.

Bodring: 2,95 dirham. So‘mda: 9000 so‘m. Toshkentda: 4000—6000 so‘m.

Sabzi: 5,7 dirham. So‘mda: 17700 so‘m. Toshkentda: 4000—6000 so‘m.

Piyoz: 5,95 dirham. So‘mda: 18500 so‘m. Toshkentda: 4000-6000 so‘m.

Ko‘rinib turibdiki, Birlashgan Arab Amirliklarida narxlar sezilarli darajada baland. Ammo shuni unutmaslik kerakki, aholining o‘rtacha daromadi ham shunga yarasha yuqori. Misol uchun, o‘rtacha BAA fuqarosi yiliga 63 ming dollar daromad topsa, bu ko‘rsatkich o‘rtacha o‘zbekistonlikda 3500—4000 dollarni tashkil qiladi.