“Qiz bolacha gapirganimda to‘ydagi ayollar kalima qaytara boshlagan”. Sherzod Mamadaliyev o‘zidagi iste’dodni qanday payqagani hamda sirk artistlarining qoniqarsiz maoshi haqida (video)

Xalqaro sirk ustasi, aktyor Sherzod Mamadaliyev “Daryo”ga bergan intervyusida O‘zbekistonda sirk ustalariga berilayotgan maosh qoniqarli emasligi hamda o‘zidagi iste’dodni qay tarzda payqagani haqida so‘zlab berdi.



“O‘zbek sirkining professional artistlari hozir chet ellarda ishlamoqda. Chunki ular O‘zbekistondagi maoshga qoniqmaydi. Ularning hayotini xavf ostiga qo‘yib bajaradigan tryuklariga bu yerda berilayotgan pul arzimaydi. O‘zimning bir ukam bor. Temur degan bola. U akrobat. Bir-biriga qo‘lini berib, otib o‘ynashardi sahnada. Yetti yilcha avval u sahnada yiqilib tushib, hozirda aravachada o‘tiribdi. Xitoyda esa kasal bo‘lib yotganimda, agar bu bola otdan yiqilib, miyasi ochilib ketganida, biz o‘z pulimizdan buni davolab, oyoqqa turg‘izardik, deyishgan. O‘sha yerda qozoq millatiga mansub sirk ustasi sahnada otdan yiqilib, miyasi jarohat olganida miyasiga plastik qo‘yib, hayotini saqlab qolishgan ekan. O‘sha bola haligacha yashab yuribdi. Xitoy tibbiyoti ham rivojlanib ketgan. Bizda ham sirk san’atiga ko‘proq e’tibor berishlarini so‘rardim.

Sirk artistlari faqat maosh bilan qotib qolsa, qiynaladi. Ular bo‘sh paytlarida konsert, tadbirlar va tug‘ilgan kunlarga chiqishadi”, — deydi Sherzod Mamadaliyev.

Sherzod Mamadaliyev ayollar ovoziga parodiya qila olish qobiliyatini qay tarzda payqagani haqida gapirdi.

“15-20 yilcha oldin o‘zimda shunday qobiliyat borligini payqaganman. U paytlar telefon, internetlar hozirgidek rivojlanmagan edi. Choyxonada o‘tirganimizda bir do‘stimga qo‘ng‘iroq qilib, ayollarnikidek ovoz bilan gapirganman. U meni o‘rtog‘imning onasi deb qabul qilgan. O‘rtoqlarim kulgidan qotib qolgan. Undan keyin bu qobiliyatimni yana bir do‘stimning to‘yida tabrik aytayotganimda ishlatganman. Hammamiz sahnaga chiqib uylanayotgan do‘stimizni birma-bir tabriklayapmiz. Menga navbat kelganida ovozimni ingichkalashtirib gapirganman. O‘sha payt to‘yxonada o‘tirgan hijobli ayollar kalima qaytara boshlagan. Keyin tabrikni o‘zimning ovozimda tugatganman. Qarabsizki, o‘shandan keyin hamma Telegram kanallarda videoyim tarqalib ketgan. Videolarimni Instagram’ga joylaganimda negativlar bo‘ladi. Turli haqoratomuz izohlar yozishadi. Bu birovga shogird tushib o‘rganilgan narsa emas, shunchaki Alloh tomonidan berilgan ikkinchi ovoz. Ushbu qobiliyatimdan foydalanib, imkon qadar insonlarga pozitiv ulashishga harakat qilaman”, — deydi aktyor. 

Sherzod Mamadaliyev bilan suhbatni quyida to‘liq tomosha qilishingiz mumkin.