Turkiyada prezidentlik saylovlarining ikkinchi bosqichida byulletenlarning 99 foizdan ortig‘i sanab chiqilgach, amaldagi davlat rahbari Rajab Toyyib Erdo‘g‘on yangi muddatga qayta saylandi. Bu haqda Turkiya Oliy saylov kengashi ma’lum qildi, deb yozadi Anadolu.
Dastlabki ma’lumotlarga ko‘ra, Erdo‘g‘on 52,14 foiz ovoz to‘pladi. Uning raqibi, muxolifatdan yagona nomzod Kemal Qilichdaro‘g‘li 47,86 foiz ovoz oldi.
Oliy saylov kengashi rahbari Ahmet Yenerga ko‘ra, amaldagi prezidentni 27 513 587 saylovchi, Qilichdaro‘g‘lini esa 25 260 210 nafar saylovchi qo‘llab-quvvatlagan.
Erdo‘g‘on 28-may kuni Istanbulda tarafdorlari oldida nutq so‘zlab, o‘zining g‘alabasini e’lon qildi. Qilichdaro‘g‘li, saylov natijalariga bag‘ishlangan nutqida, ovoz berish so‘nggi yillardagi eng adolatsiz tarzda o‘tkazilganini aytdi, ammo mag‘lubiyatini bevosita tan olmadi.
Bir qator davlatlar yetakchilari Erdo‘g‘onni qayta saylangani munosabati bilan tabriklashdi. Ular orasida O‘zbekiston prezidenti Shavkat Mirziyoyev, Ozarbayjon prezidenti Ilhom Aliyev, Serbiya prezidenti Aleksandr Vuchich, Rossiya prezidenti Vladimir Putin, Ukraina prezidenti Vladimir Zelenskiy, Armaniston bosh vaziri Nikol Pashinyan, Vengriya bosh vaziri Viktor Orban, Pokiston bosh vaziri Shahboz Sharif, Qatar amiri Tamim Ben Hamad Al Tani va boshqalar bor.
Rajab Toyyib Erdo‘g‘on 2014-yildan buyon Turkiya prezidenti bo‘lib kelmoqda. Bungacha u 2003-yildan buyon mamlakat bosh vaziri bo‘lgan.
Izoh (0)