Namangan viloyati Pop tumanida 27-may kuni Isuzu yuk mashinasining tormozi ishlamagani natijasida 5 avtomashina o‘rtasida YTH sodir bo‘ldi. Bu haqda Favqulodda vaziyatlar vazirligi axborot xizmati xabar berdi.

Xabarga ko‘ra, soat 15:25 da A-373 avtomobil yo‘lining “Qamchiq” dovoni 250-kilometrida “Toshkent—Vodiy” yo‘nalishida harakatlanib ketayotgan Isuzu yuk avtomashinasining tormoz qismi ishlamay qolishi natijasida haydovchi boshqaruvni yo‘qotgan va shu yo‘nalishda turgan Kia, Damas va 2 ta Cobalt avtomashinalariga urilib, ovqatlanish maskani hududidagi favvoraga borib tushgan. 

Dastlabki ma’lumotlarga ko‘ra, yo‘l-transport hodisasi oqibatida bir nafar fuqaro vafot etgan va uch nafar fuqaro tan jarohati bilan Pop tumani shifoxonasiga yuborilgan.

Zudlik bilan voqea joyiga FVV qutqaruvchilari va tegishli tashkilot vakillari yetib borgan. Hozirda vaziyat oqibatlari bartaraf etilmoqda.

Mazkur holat yuzasidan dastlabki tergovoldi surishtiruv ishlari olib borilmoqda.