AQSH iqtisodiga yaqinlashib kelayotgan defolt fonida boyligi 49,47 milliard dollardan ortiq bo‘lgan milliarderlar soni — hukumat majburiyatlarini bajarish uchun mamlakat Moliya vazirligida shuncha pul qolgan — 25 kishigacha ko‘paydi. Bu haqda The Hill xabar bermoqda. Hisob-kitoblar Bloomberg’ning dunyodagi eng boy odamlari indeksidan foydalangan holda amalga oshirildi. Unda agentlik asoschisi Maykl Blumbergning boyligi hisobga olinmagan. Forbes uning boyligini taxminan 94,5 milliard dollarga baholagan.
Daromadi AQSH g‘aznasida qolgan summadan ortiq milliarderlar ro‘yxatiga, jumladan, quyidagilar kiradi:
- LVMH (Moёt Hennessy — Louis Vuitton) bosh direktori Bernard Arno — 189 milliard dollar;
- Twitter, Tesla va SpaceX bosh direktori Ilon Mask — 179 milliard dollar;
- Amazon asoschisi Jeff Bezos — 139 milliard dollar;
- Microsoft asoschisi Bill Geyts — 125 milliard dollar;
- Google asoschisi Larri Peyj — 112 milliard dollar;
- Tadbirkor, L’Oreal merosxo‘ri Fransuaza Betankur-Mayers — 87,2 milliard dollar.
AQSH moliya vaziri Janet Yellen mamlakat majburiyatlarni bajarish uchun mavjud resurslarni 5-iyungacha tugatishini, shundan so‘ng defolt yuzaga kelishini aytgan. U kongressmenlarni AQSHning “ishonchi va kredit qobiliyatini imkon qadar tezroq himoya qilishga” chaqirdi va o‘tmishda, mamlakat defoltga yaqin kelib, so‘nggi daqiqalarda qaror qabul qilinganida, biznes ishonchiga jiddiy putur yetganini eslatdi. Uning ta’kidlashicha, agar Kongress milliy qarz limitini oshira olmasa, bu Qo‘shma Shtatlarning “global rahbariyatiga” ham zarar yetkazishi va “milliy xavfsizlikni himoya qilish qobiliyatini savol ostida qoldirishi” mumkin.
Yanvar oyida mamlakatning davlat qarzi maksimal 31,4 trillion dollarga yetgandi, o‘shanda Yellen 1-iyungacha g‘aznadagi pul tugashi mumkinligini aytgan. Prezident Jo Bayden va demokrat kongressmenlar Kongressni hech qanday shartlarsiz limitni oshirishga chaqirmoqda. Vakillar palatasini nazorat qiluvchi respublikachilar esa xarajatlarni qisqartirmasdan turib qarz potologini oshirishni ma’qullashdan bosh tortmoqda.
Izoh (0)