O‘zbekistonda 1-iyundan Paynet orqali naqd pul yechish xizmati sinov tarzida ishga tushiriladi. Bu haqda Markaziy bank matbuot xizmati xabar berdi.
Mazkur xizmatdan aholi UzPaynet kassalari orqali foydalanishlari mumkin bo‘ladi hamda sinov muddati 2023-yilning dekabr oyigacha davom etadi.
“Tartibga solish qumdoni” ro‘yxatiga quyidagi ma’lumotlar kiritilmoqda:
- “Tartibga solish qumdoni” ishtirokchisi: UzPaynet MCHJ (veb-sayti “Paynet.uz”);
- sinovdan o‘tkaziladigan moliyaviy xizmatning qisqacha tavsifi: UzPaynet MCHJning to‘lov agentlik tarmog‘i orqali bank kartalari saqlovchilariga naqd pul berish;
- UzPaynet MCHJ kassalari orqali bank kartalari saqlovchilariga naqd pul berishning vaqtinchalik tartibi tasdiqlangan sana: 2023-yil 12-may;
- sinovdan o‘tkazish boshlanadigan sana: 2023-yil 1-iyun;
- sinovdan o‘tkazishni tugatish sanasi: 2023-yil 1-dekabr.
May o‘rtalarida “Korzinka”ning “Shedevr” filialida virtual kassa orqali eksperiment tarzida naqd pul yechish xizmati ishga tushirilgandi. Hozirda faqat Humo kartalari orqali naqd pul yechib olish mumkin. Bunda komissiya miqdori 1 foizni tashkil etadi.
Shuningdek, naqd pul yechib olishning minimal miqdori 50 ming so‘mni, kunlik limiti esa 300 ming so‘mni tashkil etadi. Xizmat orqali supermarketda tovar sotib olingandagina pul yechib olish mumkin.
Kompaniya haqida
UzPaynet — Paynet to‘lov tizimining asoschisi hisoblanadi. U O‘zbekiston bozorida 2005-yildan buyon yirik to‘lov tashkilotlaridan biri sifatida faoliyat yuritib kelmoqda.
Kompaniya Paynet to‘lov tizimi ishlab chiqaruvchisi va savdo belgisi egasi hisoblanadi. Hozirgi kunda 390 dan ortiq xizmat ko‘rsatuvchi provayderlar to‘lovlarni tizim orqali qabul qilmoqda — mobil aloqa, internet, uy-joy, sug‘urta, va boshqalar.
Tizim orqali har kuni 1,3 milliondan ortiq to‘lovlar 25 ming to‘lovni qabul qilish punkti va mobil ilova orqali amalga oshiriladi.
Izoh (0)