“PSJ” futbolchisi Lionel Messiga Saudiya Arabistoni klubi tomonidan yiliga 500 million yevrodan ko‘proq maoshli shartnoma taklif qilinmoqda. Bu haqda Cadena SER xabar berdi.
Jurnalist Xaume Rores saudiyaliklar katta miqdorda maosh taklif qilganiga qaramay, Messi “Barselona”ga qaytishi mumkinligini ma’lum qildi.
“Fikrimcha, saudiyaliklar taklif qilinayotgan maosh miqdorini yiliga 500 million yevrodan ko‘proqqa oshirganiga qaramay, Messi ‘Barselona’ga qaytishi mumkin.
Parijdagi tajribasi Messi uchun ijobiy bo‘lmadi. Krishtianu Ronaldu Saudiya Arabistonida nimalarni boshidan o‘tkazayotganini va qanchalik qiynalayotganini hamma ko‘rib turibdi.
Leo har doim ‘Barselona’ga qaytishni xohlashini aytib kelgan va bu muhim ahamiyatga ega omil hisoblanadi. Qaror may oyida qabul qilinadi. Hamma tomon (klub, Messi, La Liga) buni xohlamoqda”, — dedi jurnalist.
May oyi boshida “PSJ”ning mag‘lubiyatidan keyin Messi rahbariyat va murabbiyning ruxsatisiz Saudiya Arabistoniga ketib qolgan va buning uchun jazolanib, ikki haftaga chetlatilgandi. Parijlik muxlislar klub ofisi yonida namoyish o‘tkazib, Messi, Neymar va Nosir al-Helayfining jamoadan ketishini talab qilgandi. Keyinroq Leo uzr so‘rab, videomurojaat yo‘lladi va “PSJ” jazoni bekor qildi.
Avvalroq Messining “Al-Hilol”ga o‘tishida Saudiya Arabistoni hukumati ham ishtirok etishi mumkinligi haqida xabar berilgan. Shuningdek, saudiyaliklar Leoni mamlakatga olib kelish uchun uning qator jamoadoshlarini ham taklif etmoqchi ekani ma‘lum bo‘lgandi.
Argentinalik futbolchi 2022/23-yilgi mavsumda “PSJ” safida barcha turnirlarda 38 ta o‘yin o‘tkazib, 20 ta gol urdi va 19 ta assistni amalga oshirdi.
Izoh (0)