Namangan viloyati Chust tumanida tadbirkordan ulush talab qilgan shaxslar qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, departamentning Chust tuman bo‘limi tomonidan DXX xodimlari bilan hamkorlikda tezkor tadbir o‘tkazilgan. Tadbirda tuman Tibbiyot birlashmasi bosh hisobchisi B.S. “Ch.O.” MCHJ bilan tuzilgan shartnomaga asosan tibbiyot birlashmasiga oziq-ovqat mahsulotlari yetkazib berish uchun o‘tkazib berilgan 1,3 milliard so‘m evaziga MCHJ ish boshqaruvchi M.M.dan ushbu mablag‘larning 10 foizi miqdorida “ulush” talab qilgan.
U shundan 2,3 ming dollarni olgan vaqtida ushlanib, uning ko‘rsatuviga asosan davom etgan tadbirda, birlashma bosh shifokori S.K. bosh hisobchidan yuqoridagi pullarni olgan vaqtida qo‘lga tushgan.
Mazkur holat yuzasidan Jinoyat kodeksining 210-moddasi (pora olish) bilan jinoyat ishi qo‘zg‘atilib, tergov harakatlari o‘tkazilmoqda.
Aprel o‘rtalarida Buxoro viloyati Shofirkon tumanida fuqarodan tahdid orqali 10 ming dollar talab qilgan shaxs ushlangani, bir necha kun oldin esa qarz evaziga berilgan pullardan foiz sifatida 1 000 dollarni tovlamachilik yo‘li bilan talab qilgan jinoiy guruh qo‘lga olingani to‘g‘risida xabar berilgandi.
Izoh (0)