Ukrainalik bolalarning Rossiyaga deportatsiyasini genotsid deb atovchi ilk xalqaro rezolyutsiya qabul qilindi
Ukrainalik bolalarni Rossiya hududiga majburan ko‘chirish amaliyoti genotsidning xalqaro ta’rifiga mos keladi. Bu haqda 27-aprel kuni Yevropa Kengashi parlament assambleyasi (PACE) tomonidan qabul qilingan rezolyutsiyada aytiladi.
Hujjatga ko‘ra, deportatsiya qilingan bolalar “ruslashtirish” jarayoniga duch kelayotgani haqida dalillar mavjud: xususan, ular rus tilida qayta o‘qitilmoqda yoki ularga ukrain tilida gapirish taqiqlanmoqda.
PACE rezolyutsiyasida ukrainalik bolalarning olib ketilishi, shubhasiz, Rossiya davlat siyosatining bir qismi ekani qayd etilgan. Hujjat mualliflarining fikricha, bu harakatlardan maqsad “ularning ukrainalik ekanini bildiruvchi barcha xususiyatlarini yo‘q qilish”.
Rezolyutsiyada, shuningdek, Gaagadagi Xalqaro jinoiy sudning Rossiya prezidenti Vladimir Putin va bolalar ombudsmani Mariya Lvova-Belovani hibsga olishga order berish haqidagi qarori olqishlanadi.
PACE rezolyutsiyasi urush boshidan beri ukrainalik bolalarni zo‘rlik bilan olib chiqishni to‘g‘ridan to‘g‘ri genotsid deb atagan birinchi xalqaro hujjat bo‘ldi.
Mart oyida ukrainalik bolalar deportatsiya qilingani uchun Xalqaro jinoiy sud Rossiya prezidenti Vladimir Putin va bolalar huquqlari bo‘yicha komissar Mariya Lvova-Belovani hibsga olishga order bergan edi. XJS ayblov xulosasida ularning harakatlari genotsid emas, balki urush jinoyatlari sifatida baholanadi.
Rossiya hukumati bolalarni bosib olingan Ukraina hududidan olib chiqayotganini inkor etmayapti, biroq bu ularning xavfsizligini ta’minlash maqsadida evakuatsiya qilinayotganini da’vo qilmoqda.
