Putinning qizlariga tegishli kompaniyalar urush yilida rekord daromad topdi — OAV 

Rossiya prezidenti Vladimir Putinning qizlari Yekaterina Tixonova va Mariya Vorontsovaga tegishli ekani aytilayotgan kompaniyalar Ukrainadagi urushning bir yilligi davomida 1,2 milliard rubldan (14 mln dollar) ko‘proq daromad topdi.

Ma’lum qilinishicha, tarixda birinchi marta mazkur firmalarning foydasi 1 milliard rubldan (12,4 mln dollar) oshdi. Misol uchun, Vorontsovaga tegishli bo‘lgan “Novaya meditsinskaya kompaniya” (Nomeko) 2022-yilda 855 million rubl (10,6 mln dollar) daromad olishga muvaffaq bo‘ldi.

Firma yadro tibbiyoti sohasidagi loyihalar bilan shug‘ullanadi, shuningdek, Rossiyaning Leningrad viloyatida ko‘p funksional tibbiyot majmuasini tashkil etishda ishtirok etadi.

Jurnalistlarning so‘zlariga ko‘ra, 2019-yilda kompaniya faoliyati foydasiz bo‘lgan. 2022-yilda Nomeko “Vagner” yollanma askarlari davolanadigan “SOGAZ Meditsina” klinikalarini sotib olgan. “Nomeko boshqaruv” sho‘ba korxonasi yana 7 million rubl (87 ming dollar) daromad topgan.

Xabarda Yekaterina Tixonovaga tegishli Milliy intellektual rivojlanish jamg‘armasi (NIR) 2022-yilda 265 million rubl (3,30 mln dollar) daromad olgani aytiladi. O‘tgan yili jamg‘armaga tegishli bo‘lgan beshta sho‘ba korxona yana 26 million rubl (324 ming dollar) daromad topgan.

Ma’lum qilinishicha, NIR neft qazib olish, geologiya, biotexnologiya va kimyo sohalarida tadqiqot olib boradi. Tixonova u yerda bosh direktor lavozimini egallaydi.

Eslatib o‘tamiz, 13-yanvar kuni rossiyalik jurnalistlar Putinning qizlari 2022-yilda to‘g‘ridan to‘g‘ri 10 million rubl (125 ming dollar) ishlab topgani haqida xabar bergandi. O‘tgan yili Rossiya prezidenti Vladimir Putinning to‘ng‘ich qizi Mariya Vorontsova 9,6 million rubl (120 ming dollar), eng kichigi Katerina Tixonova esa 5,7 million rubl (71 ming dollar) ishlab topgan.