Xitoy Ukrainadagi konflikt tomonlarning hech biriga qurol sotmaydi. Bu haqda Xitoy tashqi ishlar vaziri Tsin Ganning nutqiga tayanib, Associated Press xabar berdi.
Siyosatchi G‘arbning Xitoy Rossiyani harbiy yordam bilan qo‘llab-quvvatlashi mumkinligi haqidagi xavotirlariga shu tariqa javob qaytardi. Xitoy konfliktda mutlaqo neytral pozitsiyani egallashi, Rossiyani siyosiy va iqtisodiy jihatdan qo‘llab-quvvatlash esa “sanksiyalar va Moskvaning yakkalanishi” fonida muvozanat sari qadam ekani bildirildi.
“Xitoy konfliktning tegishli tomonlariga qurol yetkazib bermaydi, bu yerda Pekin oqilona pozitsiyani egallaydi”, — degan vazir.
Shuningdek, u Pekin ikki maqsadli fuqarolik va harbiy tovarlar eksportini tartibga solishini qo‘shimcha qildi.
“Harbiy mahsulotlar eksportiga kelsak, Xitoy qonun va qoidalarga muvofiq ikki maqsadli tovar eksportini boshqaradi va nazorat qiladi”, — dedi Tsin.
Shuningdek, u Xitoy mojaroni tinch yo‘l bilan hal qilishda yordam berishga tayyorligini ta’kidladi.
Eslatib o‘tamiz, 13-aprel kuni The Washington Post gazetasi Xitoy Rossiya uchun qurollar berishni ma’qullaganini yozgandi.
5-aprel kuni NATO yana Xitoyni Rossiyaga qurol-yarog‘ bilan yordam bermaslikka chaqirdi. Alyans bosh kotibi Yens Stoltenbergning so‘zlariga ko‘ra, Pekin Kremlga harbiy yordam yetkazilishi tarixiy xato bo‘lishini biladi.
3-mart kuni OAV Xitoy qurol-yarog‘i yetkazib berilishi haqidagi ma’lumotlar sizib chiqqani uchun Rossiyadan g‘azablangani haqida xabar berdi.
Izoh (0)