O‘zbekiston Jahon sog‘liqni saqlash tashkilotidan bolalar saratoniga qarshi dori vositalarini oladi. Bu haqda tashkilotning mamlakatdagi rasmiy ofisi xabar berdi.
Ma’lum bo‘lishicha, 12–13-aprel kunlari AQSHning Memfis shahrida saraton kasalligiga chalingan bolalarni dori-darmon bilan ta’minlash bo‘yicha global platformani ishga tushirishga tayyorgarlik ko‘rish masalasiga bag‘ishlangan forum bo‘lib o‘tadi va unda O‘zbekiston delegatsiyasi ishtirok etadi.
“Dori vositalari bilan ta’minlash bo‘yicha global platforma 2027-yilgacha 50 ta past va o‘rta daromadli mamlakatlarda taxminan 120 000 bolani moliyaviy qiyinchiliklarsiz saratonga qarshi, xavfsiz, samarali va sifatli dori-darmonlar bilan ta’minlashga yordam berishga qaratilgan.
Forum dori vositalarini muvaffaqiyatli yetkazib berish va platformani ishga tushirishga tayyorgarlik ko‘rishda yetakchilik va yondashuv tamoyillarini aniqlash bo‘yicha birgalikda ish olib borish uchun turli mamlakatlardan, bolalarda uchraydigan saraton kasalliklarini davolash uchun dori vositalaridan foydalanish imkoniyati masalasiga jalb qilingan tashkilotlar va keng ekspertlar doirasidan iborat hamkorlarni birlashtiradi.
Forum bolalarda uchraydigan saraton kasalliklariga qarshi dori vositalaridan foydalanish bilan bog‘liq ehtiyojlarni qondirish uchun ilg‘or tajriba va strategiyalar almashinuviga yordam beradi. Bu ishtirokchilarga platforma jarayonlarini, uning tajriba bosqichida va undan keyingi davrda amalga oshirilishini optimallashtirish uchun birgalikda ishlab chiqish imkonini beradi.
Bugungi kunga kelib, platformada ushbu bosqichda taqdim etiladigan dori vositalarining to‘liq ro‘yxati belgilandi. Dunyoning olti davlati, jumladan, O‘zbekiston birinchi bosqichda bolalar saratoniga qarshi asosiy dori vositalarini oladi. Ushbu dori-darmonlar topshirilishi platformaning 2023-yil sentabr oyida (shartli ravishda) rasmiy ishga tushirilishiga to‘g‘ri keladi.
O‘zbekiston bolalar saratoni bo‘yicha global tashabbus bo‘yicha birgalikda ish olib borish va Jahon sog‘liqni saqlash tashkiloti bilan yaqin hamkorlikda, shuningdek, mamlakat siyosiy rahbariyati tomonidan bolalar saratoniga qarshi kurashga e’tibor qaratilishida muvaffaqiyatlarini namoyish etgan dastlabki olti davlatdan biri sifatida tanlangan.
Izoh (0)