O‘zbekistonda 2023-yilning o‘tgan uch oyi davomida tez yordam xizmatiga 893 ta yolg‘on chaqiriq kelib tushgan. Bu haqda SSV matbuot xizmati xabar berdi.
Qayd etilishicha, ushbu yolg‘on chaqiriqlarning eng ko‘p ko‘rsatkichi Toshkent viloyatida qayd etilgan — 189 ta. Keyingi o‘rindan 154 ta chaqiriq bilan Farg‘ona viloyati joy olgan. Shuningdek, Qashqadaryo viloyatidan 114 ta, Toshkent shahridan 96 ta hamda Navoiy viloyatidan 84 ta ana shunday murojaat kelib tushgan.
Eng kam yolg‘on chaqiriq esa o‘tgan uch oyda Samarqand viloyatida ro‘yxatga olingan — 2 ta.
“Baʼzan ‘103’ga qo‘ng‘iroq qilib, bemorni boshqa mashinada kasalxonaga olib ketish holatlari uchraydi. Bundan tashqari, chaqiruv manzilini noto‘g‘ri berish, ustiga-ustak, tez yordam yetib borganida, eshikni ochmaslik, telefon qo‘ng‘iroqlariga javob bermaslik kabi noxush vaziyatlar ham takrorlanib turadi”, — deydi Respublika tez tibbiy yordam markazi Toshkent shahar filiali direktori Ilhom Aslanov.
Aslanovning ta’kidlashicha, bunday vaziyatlar tez yordam faoliyatiga salbiy taʼsir ko‘rsatib, shifokorlarning belgilangan manzilga o‘z vaqtida yetib borishiga to‘sqinlik qiladi. Shunga qaramay, asossiz va yolg‘on chaqiriqlar statistikasi yildan yilga kamaymoqda.
Avvalroq O‘zbekistonda 2023-yilning o‘tgan uch oyi davomida tez yordam xizmatiga 3 milliondan ortiq chaqiriq kelib tushgani ma’lum qilingandi. 2022-yil oktabr ma’lumotlariga ko‘ra, O‘zbekistonda tez yordam xizmatida faoliyat yuritayotgan shifokorlar soni qariyb 13 ming 800 nafarga yetgan. Shuningdek, tizimda mehnat qilayotgan o‘rta tibbiyot xodimlari soni 29 ming 156 nafarni tashkil qilmoqda.
Shu bilan birga, mamlakatda tez yordam xodimlari bemorlar hamda ularning yaqinlari tomonidan tez-tez qarshiliklarga uchrab turadi. Xususan, bundan oldin Toshkent shahar Bektemir tumanida tez yordam mashinasida olib ketilayotgan ayol tibbiyot xodimlariga qarshilik ko‘rsatib, salondagi jihozlarni tepib sindirgani to‘g‘risida xabar berilgandi. Keyinroq ayol spirtli ichimlik ta’sirida bo‘lgani ma’lum qilindi. Bir necha kun oldin Yunusobod tez tibbiy yordam podstansiyasi feldsheri Zlata Gafurova chaqiriq bo‘yicha erkak shifokorlar brigadasini yuborgani uchun bemorning o‘g‘li tomonidan tahdidga uchrayotgani ma’lum bo‘ldi.
Izoh (0)