Kundalik hayotimizni o‘ziga bo‘ysundiruvchi ishlar ro‘yxati ko‘pchilikka yoqmaydi. Biroq quyida tasvirlangan oddiy tartib, albatta, hayot sifatini yaxshilaydi va nafaqat kayfiyatingizga, balki farovonligingizga ham ta’sir qiladi. Xo‘sh, har kuni tozalash kerak bo‘lgan narsalar qaysi?
Rakovina
Qo‘l yoki idishlarni yuvgandan so‘ng, rakovina tozadek ko‘rinishi mumkin, lekin aslida unda chirk va bakteriyalar qoladi. Tozalikka jiddiy yondashadigan bo‘lsangiz, uni yaxshilab tozalash uchun shimgich bilan artib, so‘ng suv ketadigan joyni mahkamlab, rakovinani iliq suv bilan to‘ldirish lozim. Suvga bir osh qoshiq miqdorda dezinfeksiyalovchi vositadan solib rakovinani yana tozalash kerak. Suvni shu holida besh daqiqa qoldirib, keyin oqizib yuboriladi va rakovina artib quritiladi.
Oshxona va hammom sochiqlari
Ha, ular toza ko‘rinishi mumkin, ammo o‘tkazilgan tadqiqotlarning birida oshxona sochiqlari butun oshxonadagi eng iflos buyum sifatida belgilangan. Hammomdagi yuz artadigan sochiqlar ham xuddi shunday. Agar sochiqlarni kuniga bir martadan ko‘proq ishlatsangiz, qo‘l sochiqlari tezroq ifloslanadi. Ular har ikki kunda, agar katta oilada yashasangiz har kuni o‘zgartirilishi kerak.
Stol yuzasi
Stol ustiga qo‘yadigan narsalaringiz haqida o‘ylab ko‘ring. Avtomobil va uy kalitlari, pochta xatlari, turli paketlar, hamyon va boshqa ko‘p narsalar. Bularning barchasi qanchalik kir ekanligini sezmaslikning iloji yo‘q. Ovqat qoldiqlari ham shular jumlasidandir. Har kuni foydalaniladigan stol ustini artib, dezinfeksiya qilish kerakligini unutmang.
Yuvilmagan idish-tovoqlar
Idish-tovoqda bir kecha qoldirilgan sous va ovqat qoldiqlari hasharotlarni o‘ziga jalb qilishi va yuvishni qiyinlashtirishi mumkin. Idishlarni foydalanib bo‘linishi bilan darhol qo‘lda yoki idish yuvish mashinasida yuvish kerak.
Kofe qaynatgich
Har kuni bir finjon qahva qaynatsangiz, unda qahva qaynatgich bakteriya va mog‘orlar uchun ko‘payish maydoniga aylanadi. Uni har kuni tozalashingiz kerak. Kofe qaynatgichning olinadigan qismlarini har foydalanishdan keyin qoldiqlarni olib tashlash uchun yuvgan ma’qul. Buni sovunli iliq suv bilan rakovinada yoki idish yuvish mashinasida bajarish odatga aylangan.
Dush kabinasi
U qanday o‘rnatilgani muhim emas. Har foydalanishdan keyin uning devorlarini artib olish muhim. Agar dush kabinasi plastik bo‘lsa uni muntazam tozalash kerak. Har qanday holatda ham tozalash vaqtida devorlardan ortiqcha namlikni artib oling, bu mog‘or paydo bo‘lishining oldini oladi.
Mavzuga doir:
Izoh (0)