Ayni vaqtda prezident Shavkat Mirziyoyev xalq deputatlari Xorazm viloyati Kengashi sessiyasida ishtirok etmoqda. Bu haqda “Daryo” muxbiri xabar berdi.
Viloyat hokimi Jo‘rabek Rahimov davlat rahbariga oziq-ovqat balansi bo‘yicha rejalari to‘g‘risida axborot berdi. Prezident bulardan kelib chiqib masʼullarga qator topshiriqlar berdi.
Shavkat Mirziyoyev “Toshsoqa tizimidagi magistral sug‘orish kanalini tiklash” loyihasi 2-bosqichini boshlash vaqti-soati kelganini taʼkidlab, bir oy muddatda bu loyiha bo‘yicha takliflarni taqdimot qilish yuzasidan topshiriq berdi.
Shuningdek, ikki hafta muddatda “Daryoliq” magistral kollektori tizimiga nasoslar o‘rnatishga 35 milliard so‘m ajratiladi. Yil yakuniga qadar Bog‘ot, Shovot va Yangibozorda 2 ming gektarda uzum, olma va qovun plantatsiyalari yaratilib, lizing asosida tadbirkorlarga tarqatiladi.
2023-yilda Gurlan va Bog‘otda agro-logistika markazlari tashkil etilib, unga 5 million dollar yo‘naltiriladi. Uch oyda chorvachilikka ixtisoslashgan 53 ta mahallada sutni qabul qilish punktlari ochilib, tadbirkorlarga beriladi va bu ishlarga 20 milliard so‘m yo‘naltiriladi.
Bundan tashqari, parranda go‘shti tanqis 363 ta mahallaning har birida ikki ming bosh parranda boqishga mo‘ljallangan ikkitadan loyiha boshlanadi va bunga 10 mln dollar ajratiladi.
Jo‘rabek Rahimov sanoat qanchaga o‘sishi, qaysi loyihalar amalga oshirilishi, har bir tumanga kamida 50 mln dollar investitsiya jalb qilish bo‘yicha hisobot berdi.
Bu borada yil yakuniga qadar 14 ta yirik sanoat loyihalari infratuzilmasi uchun qo‘shimcha 100 milliard so‘m yo‘naltiriladi. Yil yakuniga qadar Urganch shahri va Urganch tumanida elektrotexnika va farmatsevtika sanoat parklari tashkil qilinadi.
Izoh (0)