Toshkent viloyatida qariyb 8 gektar yerni 144 ming dollarga sotishga uringan shaxs ushlandi
Toshkent va Samarqand viloyatlarida yer maydonlari savdosi bilan bog‘liq firibgarlik holatlari fosh etildi, deb xabar beradi Bosh prokuratura huzuridagi departament.
Qayd etilishicha, departamentning Ohangaron tuman bo‘limi tomonidan IIV xodimlari bilan hamkorlikda tezkor tadbir o‘tkazilgan. Tadbirda fuqaro R.X. Yuqori Chirchiq tumani, “Birlik” MFY hududidagi “R.T.” MCHJga qarashli 7,8 gektar yer maydonini fuqaro M.X.ga 144 ming dollarga sotishga kelishgani aniqlangan. U go‘yoki yuqori lavozimda ishlovchi tanishlari yordamida yer maydoni kadastr hujjatlarini rasmiylashtirib berishi evaziga oldindan 10 ming dollarni olgan vaqtida ashyoviy dalillar bilan ushlangan.
Shu kabi, departament hamda DXXning Samarqand viloyati boshqarmalari tomonidan o‘tkazilgan tezkor tadbirda fuqaro K.F. o‘g‘li SH.F.ning Samarqand tumanidagi “Q.M.” fermer xo‘jaligining 15 gektar yer maydonini firibgarlik yo‘li bilan fuqaro X.F.ga har bir gektarini ming dollardan hisoblab sotishga kelishib, 15 ming dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Navoiyda 80 gektar yer maydonini xaridorga 1 milliard so‘mga sotishga kelishib, oldindan 700 million so‘m olgan tuman favqulodda vaziyatlar bo‘limi xodimi qo‘lga olingan edi.
