Afg‘onistonning hukumat tepasidagi “Tolibon” harakatiga bo‘ysunuvchi Qurolli kuchlari soni 200 ming kishiga yetkaziladi. Bu haqda “Tolibon” armiyasi bosh shtabi boshlig‘i qori Fasihuddin Fitrat ma’lum qildi, deb xabar bermoqda TOLOnews telekanali.
“Kelgusi yil armiyadagi harbiy xizmatchilar sonini 150 mingdan 170 mingga oshirishga va asta-sekin 200 mingga yetkazishga qaror qildik”, — dedi u.
2021-yil avgust oyi o‘rtalarida “Tolibon” Afg‘onistonda hokimiyatni qo‘lga kiritgan paytda ularning qo‘l ostidagi jangchilar soni 100 ming kishi, deb baholangan edi. 2022-yil fevral oyida “Tolibon” vakillari o‘z Qurolli kuchlari sonini 150 ming kishiga yetkazish niyatida ekanini ma’lum qilishdi.
Hozirgacha “Tolibon” hatto o‘z harbiy-havo kuchlarini yaratishga muvaffaq bo‘lgan. Ushbu kuchlar ixtiyorida o‘nlab samolyotlar mavjud bo‘lib, ularni allaqachon jangovar harakatlarda qo‘llash boshlangan.
Izoh (0)