Putin Rossiya tashqi siyosatining yangi konsepsiyasini tasdiqladi
Rossiya prezidenti Vladimir Putin tashqi siyosat konsepsiyasining yangi tahririni tasdiqladi. U Rossiya Federatsiyasi Xavfsizlik kengashining doimiy a’zolari bilan uchrashuvda tegishli farmonni imzolaganini ma’lum qildi. Bu haqda “TASS” xabar berdi.
Ushbu hujjat mamlakatning xalqaro faoliyatining ustuvor yo‘nalishlari, maqsad va vazifalarini belgilaydi, u Rossiya Tashqi ishlar vazirligi va boshqa vazirlik, idoralar uchun yo‘l xaritasi bo‘ladi.
“Rossiya o‘zini rus dunyosining tayanchi va global muvozanatni saqlaydigan o‘ziga xos sivilizatsion davlat sifatida belgilaydi”, — deyiladi konsepsiyada.
AQSH Rossiyaga qarshi harakatlarning asosiy yo‘lboshchisi deb qaralgan. Konsepsiya xalqaro hayot doirasini belgilashda G‘arbning monopoliyasini to‘xtatish zarurligini ham nazarda tutadi. Rossiya xavfsizligiga “do‘stona bo‘lmagan” davlatlar tomonidan tahdidlar “ekzistensial” deb tan olingan. Bundan tashqari, Rossiya va uning ittifoqchilariga qurolli hujumni qaytarish yoki oldini olish uchun qurolli kuchlardan foydalanish tezislari kiritilgan.
Quyida yangilangan konsepsiyaning asosiy tezislari keltirilgan:
- Rossiya o‘zini G‘arbning dushmani deb hisoblamaydi va o‘zini undan ajratib qo‘ymaydi;
- Moskva G‘arb davlatlarining qarama-qarshilik befoydaligini anglab yetishiga va teng huquqli hamkorlikka qaytishiga umid qilmoqda;
- Rossiya Vashingtonni o‘z xavfsizligi va xalqaro tinchlik uchun xavflarning asosiy manbai deb biladi;
- AQSHning dunyodagi hukmronligi qoldiqlarini yo‘q qilishga ustuvor ahamiyat beriladi;
- Moskva barcha mamlakatlar uchun o‘zarolik tamoyili asosida xavfsizlikni teng ta’minlashga intiladi;
- Xitoy va Hindiston bilan aloqalarni har tomonlama chuqurlashtirish va muvofiqlashtirish alohida ahamiyatga ega;
- Yaqin xorijdagi asosiy maqsad mintaqani tinchlik, yaxshi qo‘shnichilik va farovonlik hududiga aylantirishdir.
Birinchi marta Rossiya tashqi siyosati konsepsiyasi 1993g-yilda tasdiqlangan, keyin u qayta-qayta yangilangan. 2016g-yilgi konsepsiyada Rossiya tashqi siyosatining vazifalari orasida “jahon hamjamiyatidagi mustahkam pozitsiyalarni saqlash va mustahkamlash”, shuningdek, “qo‘shni davlatlar bilan yaxshi qo‘shnichilik munosabatlarini shakllantirish” o‘rin olgandi. Putin 2022-yil 28-yanvar kuni Xavfsizlik kengashi a’zolari bilan konsepsiyani yangilash masalasini muhokama qildi.
