Donald Trampga qarshi jinoiy ayblov e’lon qilindi
Manxetten okrugidagi katta hakamlar hay’ati 30-mart kuni Donald Trampga jinoiy ish bo‘yicha ayblov e’lon qilish uchun ovoz berdi, deb yozadi The New York Times to‘rtta manbaga tayanib. Oradan bir necha soat o‘tgach, bu ma’lumot prokuratura tomonidan rasman tasdiqlandi.
Prokurorlar siyosatchini qo‘lga olish vaqtini kelishish uchun sobiq prezidentning advokatlari bilan bog‘langan. Trampning himoyachilari aytishicha, bu keyingi hafta sodir bo‘lishi mumkin. Tramp qo‘lga olinib, suratga tushirilishi, shuningdek, undan barmoq izlari olinishi kutilmoqda, shundan so‘ng sudya unga nisbatan qanday ehtiyot chorasi belgilash haqida qaror qabul qiladi. Bu AQSH tarixida birinchi marta mamlakatning amaldagi yoki sobiq prezidentiga jinoiy ayblov qo‘yilishidir.
Trampning qarorgohi joylashgan Florida shtati gubernatori Ron DeSantisning aytishicha, agar Nyu-York prokurorlari tomonidan ekstraditsiya so‘rovi yuborilsa, shtat unga javob qaytarmaydi.
Ayblov tafsilotlari tuman prokurorining qarori bilan bir necha kun ichida e’lon qilinadi. Ma’lumotlarga ko‘ra, AQSH sobiq prezidenti jiddiy moddada ayblanmoqda — bu 2016-yilgi saylovlar oldidan Trampning advokatlari sobiq aktrisa Stormi Denielsga jim yurishi uchun 130 ming dollar to‘lagani bilan bog‘liq.
Siyosatchining o‘zi Deniels bilan aloqani rad etdi, unga pul to‘langanini izohlashdan bosh tortdi. NYT so‘roviga javoban Tramp unga qarshi ochilgan ishni siyosiy motivli deb atadi. CNN ish bilan tanish bo‘lgan ikki manbaga tayanib, Trampga qarshi ishda o‘ttizdan ortiq firibgarlik ayblovlari borligini yozmoqda.
