Andijonda 2022-yil davomida korrupsiya holatlarini fosh etish borasida olib borilgan tezkor tadbirlar davomida 245 ta jinoyat ishi qo‘zg‘atilgan. Bu haqda Andijon viloyati prokuraturasi tomonidan o‘tkazilgan matbuot anjumanida maʼlum qilindi, deya xabar bermoqda “Daryo” muxbiri.
Taʼkidlanishicha, Bosh prokuratura huzuridagi Iqtisodiy jinoyatlarga qarshi kurashish Departamenti viloyat boshqarmasi va uning hududiy bo‘limlari tomonidan 2022-yil davomida jami 527 ta huquqbuzarlik aniqlanib, shulardan 491 tasi bo‘yicha jinoyat ishlari qo‘zg‘atilgan bo‘lsa, 36 tasi bo‘yicha maʼmuriy ishlar yuritilgan.
Departamentning viloyat boshqarmasi xodimi Isaqjon G‘oziboyevning maʼlum qilishicha, korrupsiya holatlarini fosh etish borasida 245 ta jinoyat ishi qo‘zg‘atilgan bo‘lib, shundan 33 tasi yer masalalari bilan bog‘liq.
“2022-yildagi korrupsiya holatlarini fosh etish borasida olib borilgan tezkor tadbirlar davomida 245 ta jinoyat ishi qo‘zg‘atilgan. Ularning asosiy qismi so‘nggi vaqtda og‘riqli va ayanchli holatlardan biri bo‘lgan yer ajratilishi va egalik huquqini beruvchi hujjatlarni tayyorlab berish evaziga pul talab qilganlik holatlari bo‘lib, mazkur yo‘nalish bo‘yicha 33 ta jinoyat ishi qo‘zg‘atilgan”, — deydi Isaqjon G‘oziboyev.
Qayd etilishicha, iqtisodiy jinoyatlar bilan bog‘liq qo‘zg‘atilgan ishlar sohalar kesimida tahlil qilinganda asosan hokimiyat, sog‘liqni saqlash, taʼlim, transport va yo‘l qurilish tizimlarida yuz berayotganligi aniqlangan.
Izoh (0)