Nukus voqealari bo‘yicha sudlangan 22 kishining 16 nafari sudga appelyatsiya shikoyati kiritdi. Bu haqda Oliy sud matbuot kotibi Aziz Obidov xabar qildi.
2022-yil 1—2 iyul-kunlari Nukus shahridagi ommaviy tartibsizliklarni sodir etganlikda ayblangan 22 nafar shaxsga nisbatan 2023-yil 31-yanvar kuni Qoraqalpog‘iston Respublikasi sudining hukmi e’lon qilingandi.
Oliy sud matbuot xizmati axborotiga ko‘ra, birinchi instansiya sudining hukmi ustidan sudlanuvchilar D.Tajimuratov, P.Shamshetov (marhum), S.Kalimov, S.Kaipov, A.Temirxanov, S.Medetov, N.Sultanmuratov, A.Tokimbetov, R.Bekmuratov, B.Seytniyazov, A.Adilbekov, P. Nurniyazov, N.Nayipov, B.Kadirbergenov, D.Djiyemuratov, Q.Seytimov va ularning himoyachilari tomonidan appelyatsiya shikoyati kiritilgan.
Prokuratura tomonidan esa mazkur sud hukmining sudlanuvchilar L.Qallixanova, A.Turdanov, A.Smetullayev va A.Nuratdinovga oid qismiga nisbatan protest keltirilgan.
Jinoyat ishining ushbu sudlanuvchilarga oid qismi kiritilgan shikoyatlar va keltirilgan protestga asosan Oliy sudning Jinoyat ishlari bo‘yicha sudlov hay’ati tomonidan appelyatsiya tartibida ko‘rib chiqiladi.
Izoh (0)