Alixon Smailov Qozog‘iston bosh vaziri lavozimiga qayta tayinlandi
Qozog‘iston Majlisi (parlamenti quyi palatasi) deputatlari prezident Qosim-Jo‘mart To‘qayev tomonidan taklif etilgan Alixon Smailovning nomzodini ko‘pchilik ovoz bilan respublika bosh vaziri lavozimiga ma’qulladi, deb xabar bermoqda “KazTAG”.
Qayd etilishicha, ovoz berishda ishtirok etgan 97 deputatdan 82 nafari Smailovning qayta tayinlanishini yoqlagan, yetti nafari qarshi chiqqan, yana sakkiz kishi betaraf qolgan. Sobiq bosh vazirning qayta saylanishiga Umummilliy sotsial-demokratik partiya (NSDP) vakili bo‘lgan parlament muxolifati qarshi bo‘ldi.
To‘qayev parlamentdagi nutqida bosh vazirlikka nomzodni tajribali, halol va mehnatsevar inson deb atadi.
“U hukumat oldida turgan muammolarni yaxshi biladi. Unga yangi hukumat jilovini ishonib topshirish mumkinligiga aminman”, — dedi To‘qayev.
Majlisda ovoz berishdan so‘ng To‘qayev Smailovni qayta tayinlash to‘g‘risidagi farmonni imzoladi.
30-mart kuni ertalab parlamentdagi ko‘pchilik o‘ringa ega bo‘lgan “Amanat” partiyasi prezidentga Smailovni bosh vazir lavozimiga tasdiqlashni taklif qilgan. Shundan so‘ng, qonunga muvofiq, To‘qayev barcha parlament fraksiyalari rahbarlari bilan uchrashuv o‘tkazib, bosh vazir nomzodini muhokama qilgan.
Smailov Qozog‘istonda 2022-yil yanvar voqealaridan keyin bosh vazir lavozimiga tayinlangan edi. 2023-yil 29-mart kuni yangi konstitutsiyaga muvofiq Smailovning vakolat muddati tugadi, uning rahbarligidagi hukumat to‘liq tarkibda iste’foga chiqdi.
