Rossiyada tanishining qulog‘ini kesib tashlagan o‘zbekistonlik erkakka hukm o‘qildi 

Rossiyaning Tula viloyatida mast tanishining qulog‘ini kesib tashlagan O‘zbekiston fuqarosiga sud hukmi o‘qildi. Bu haqda TCH24 xabar berdi.

Hodisa 7-dekabr kuni yuz bergan, o‘zbekistonlik erkak notanish xonadonda tanishlari bilan spirtli ichimlik ichgan. Shaxsiy kelishmovchilik tufayli u 55 yoshli hamrohini kaltaklagan. Jabrlanuvchi polga yiqilgach, uning chap qulog‘ini kesib tashlagan.

Oqibatda jabrlanuvchi olgan tan jarohatlari tufayli voqea joyida halok bo‘lgan. Uning jasadi ayblanuvchi va xonadon egasi tomonidan podyezd kiraverishidagi zinapoyaga olib tushib qo‘yilgan. Qotillik sodir etgan erkak qasddan badanga og‘ir shikast yetkazish, ehtiyotsizlik oqibatida jabrlanuvchining o‘limiga sabab bo‘lishda ayblangan.

Tula viloyati prokurorining birinchi o‘rinbosari tomonidan O‘zbekiston fuqarosiga nisbatan qo‘zg‘atilgan jinoyat ishi bo‘yicha davlat ayblovi qo‘llab-quvvatlangan. Sud erkakni 9 yilga ozodlikdan mahrum qilish bilan birga 1 yilga qattiq rejimdagi koloniyada jazo o‘tashga hukm qildi.