“Oltin, mis va uran eksporti O‘zbekiston budjetining 30 foizini tashkil etadi” – Dilshod Sultonov

Bugun, 29-mart kuni AOKAda Iqtisodiyot va moliya vazirligining 2022-yildagi faoliyati va 2023-yildagi vazifalarga oid matbuot anjumani bo‘lib o‘tdi. Muloqotda vazirlik rasmiylari OAV vakillari savollariga javob qaytardi.

Vazir o‘rinbosari Dilshod Sultonov O‘zbekiston qazilma boyliklaridan olinayotgan daromad qiymati haqidagi savolga qisqacha javob berdi.

“Oltin, mis va uran eksporti O‘zbekiston budjetining 30 foizini tashkil etadi”, – dedi u.

Dilshod Sultonovning taʼkidlashicha, 2022-yilda mamlakat eksporti miqdori 23,6 foizga o‘sgan.

“Davlat budjeti daromadlari 2022-yilda 202 trillion so‘mni (YAIMga nisbatan 22,7 foiz) tashkil etib, 2021-yilga nisbatan 37,2 trillion so‘mga yoki 22,6 foizga oshdi”, – dedi vazir o‘rinbosari.

Avvalroq O‘zbekiston yanvarda 1,2 milliard dollarlik oltin sotgani, fevralda esa mamlakat narxlar pastligi sabab oltin sotmagani xabar qilingandi.