Ajoyib sujet va yuqori reytingga ega bo‘lsa ham tomoshabinlar e’tiboridan chetda qolgan 2022-yilda chiqqan ajoyib multfilmlar
Ko‘pincha televizorda tez-tez ko‘rsatiladigan, reklamasini ko‘rgan multfilmlarni tomosha qilamiz yoki bolalarimizga qo‘yib beramiz. Ammo har yili sujeti va tasvir sifati bilan hayratga soladigan boshqa ko‘plab animatsion filmlar ekranlarga chiqadi. Ularning reytinglari ham ancha yuqori.
“Suzume eshiklarni yopadi”
17 yoshli Suzume (Nanoka Xara) Kyushu orolidagi kichik shaharchada yashaydi. Bir kuni u qandaydir eshik izlayotgan sirli yosh sayohatchini uchratadi. O‘rta maktab o‘quvchisi uning qidiruvlariga qo‘shiladi va ular birgalikda Yaponiya bo‘ylab bir qator ofatlarning oldini olishga harakat qilishadi.
Animening jahon premyerasi 2023-yil fevral oyida 73-Berlin kinofestivalida bo‘lib o‘tdi. Bu kinofestivalda qatnashayotgan ikkinchi anime bo‘lib, bundan avval 2002-yilda “Ruhlar olami” animesi namoyish etilgan.
IMDb reytingi - 7,8
“Kichkina Nikolya”
Parijda ikki nafar tinib-tinchimagan odam yashagan — yozuvchi va rassom, ular o‘z sarguzashtlari bilan kulrang kundalik hayotni rang-barang qila oladigan qahramonni o‘ylab topgan. Nikolya shunday paydo bo‘ladi — ota-onasini yaxshi ko‘radigan, maktabga boradigan, do‘stlari bilan muloqot qiladigan va uchuvchi bo‘lishni orzu qiladigan shumtaka bola. Uning asosiy fazilati — hatto eng oddiy narsalarda ham o‘yin-kulgi va zavqlana olish qobiliyatidir.
IMDb reytingi - 7.3
“Ernest va Selestina: yangi sarguzashtlar”
Ernest va Selestina shunchaki do‘st emas, chunki ularning biri ayiq, ikkinchisi sichqon. Bir safar ular Ernestning dunyoning eng iqtidorli musiqachilari yashaydigan ona shahriga borishadi. Ammo yetib borgach, do‘stlar u yerda musiqa ko‘p yillar davomida taqiqlanganligini bilishadi. Ular yangi do‘stlari va sirli niqobli jinoyatchi bilan birgalikda ayiqlar mamlakatiga quvonch keltirishga qaror qilishadi.
IMDb reytingi - 7.2
“Bu uy”
16 yoshdan oshganlar uchun mo‘ljallangan ushbu multfilmning sujeti mistik uy va uning turli davrlardagi bir necha aholisi atrofida sodir bo‘ladi. Ular qo‘rqinchli g‘ayritabiiy hodisalar va aqldan ozdiradigan mavjudotlarga duch kelishadi.
IMDb reytingi - 6,8
“Ikar”
Krit orolida Minos hukmronligi davrida Olimp xudolari mahalliy aholini dahshat va hayratga soladi. Hech kim ular bilan bahslashishni xayoliga ham keltirolmaydi. Biroq yosh Ikar ularga qarshi chiqishdan qo‘rqmaydi va o‘zining eng yaqin do‘sti — buqa boshli sirli Bolani deb hayotini xavf ostiga qo‘yadi.
IMDb reytingi - 6,7
“G‘aroyib Moris”
Moris gapiradigan kemiruvchilar bilan Dryan-Blinzburg shahriga kelib qoladi. Ular bu shaharda xavf yashiringanini bilib qolishadi. Ular mushuk-sichqon o‘ynashlari va u yerda yashovchi barcha ikki oyoqlilarni hayratda qoldiradigan joyning asosiy sirini ochishlari kerak.
IMDb reytingi - 6,3
“Suzuvchi uy”
Qadrdon do‘stlar va qiziquvchan qo‘shnilar Kosuke va Natsume 6-sinf o‘quvchilari bo‘lib, har doim yangi sarguzasht va kashfiyotlar izlaydilar. Tez orada vayron bo‘ladigan uylari hovlisida o‘ynab, ular atrofidagi dunyo ulkan okeanga, uy esa suzuvchi orolga aylanganini ko‘rishadi. O‘smirlar ishtiyoq bilan unutilmas sayohatga otlanishadi — ular o‘z vatanlariga qaytish yo‘lini topishlari kerak.
IMDb reytingi - 6,2
“Olovyurak”
Nyu-York 1920-yillar. Bosh qahramon Jorjiya Nolan har doim dunyodagi birinchi o‘t o‘chiruvchi ayol bo‘lishni orzu qilgan. Uning otasi sobiq o‘t o‘chiruvchi, hozir esa tikuvchi. O‘t o‘chiruvchilar sirli ravishda g‘oyib bo‘la boshlaganidan keyin eski ishiga qaytishga majbur bo‘ladi. Jorjiya bundan xabar topadi va imkoniyatdan foydalanishga qaror qiladi. O‘zini ko‘ngilli bola sifatida ko‘rsatib, u yong‘inga qarshi kurashadigan jamoaga qo‘shiladi.
IMDb reytingi - 6,2
