Shimoliy Koreya yetakchisi Kim Chen In mamlakatning yadroviy salohiyatini oshirish uchun yadroviy materiallar ishlab chiqarishni ko‘paytirishni buyurdi, deb xabar bermoqda EA Daily Koreya markaziy axborot agentligiga tayanib.
“Koreya Mehnat partiyasi Markaziy Qo‘mitasining yadro quroli sonini ko‘paytirish rejasini to‘liq amalga oshirish uchun kelajakda qurol-yarog‘ga mo‘ljallangan yadroviy materiallar ishlab chiqarishni kengaytirish va kuchli yadro qurollarini ishlab chiqarishni davom ettirishga turtki berish zarur”, — deydi Kim Chen In.
Shimoliy Koreya rahbari, shuningdek, yadro salohiyatini rivojlantirish mamlakat suverenitetini himoya qilish uchun zarur ekanini ta’kidladi.
21—23-mart kunlari o‘tkazilgan mashg‘ulotlar doirasida Shimoliy Koreya “sunami chaqirishga qodir” suvosti dronini sinovdan o‘tkazgan edi. “Ushbu maxfiy qurol yadroviy suvosti kemasi hujumini amalga oshiruvchi drondir. Uning vazifasi — yashirincha suzib borish, suv ostida portlab, dushman kema guruhlari va portini yo‘q qilish uchun o‘ta kuchli radioaktiv sunami hosil qilish”, — deyiladi “Koreya ovozi” davlat radiosida.
18 va 19-mart kunlari bo‘lib o‘tgan mashg‘ulotlarda esa Shimoliy Koreya harbiylari yadroviy zarba berish qo‘mondonligi tizimini boshqarishni, yadroviy hujumga zudlik bilan o‘tish usullarini mashq qilgan.
Kim Chen In mashg‘ulotlar yakunida harbiylar “istalgan vaqtda zudlik bilan, kuchli va faol yadroviy javobga” tayyor turishi kerakligini aytdi.
Izoh (0)