“Hokimiyatga o‘zimni o‘ldiraman deb benzin ko‘tarib bordim, dardimni eshitishmadi” (video)

“Mehridaryo” loyihasida toshkentlik ikki nafar farzandning onasi Rohatoy Irismatova murojaat qilib, tang ahvolda qolganini aytib, xalqdan yordam so‘radi. 

— Ikki nafar farzandimni yolg‘iz katta qilyapman. Turmush o‘rtog‘im bizdan voz kechganidan keyin, bolalarim bilan ko‘chada qoldik. Oilaviy stresslar sabab psoriaz kasalligini ortirib oldim. 

Uy-joyim yo‘q, otam o‘limidan avval qizlik uyimizni sotgan ekan. Uyning yangi egasi meni sud orqali ro‘yxatdan o‘chirtirdi. 

Psoriaz kasalligi suyak yemirilishiga ham sabab bo‘lar ekan. Kundan kunga ahvolim yomonlashyapti. Shifokorlar menga qimmat doridan 20 ta olishim kerakligini aytdi. Ammo uni sotib olishga va davolanishga imkoniyatim yo‘q. Onkologiya kasalxonasiga ham borishim kerakligini aytishdi. Ammo meni qabul qilishgani yo‘q. Bepul davolanishim uchun ID karta olishim kerak ekan. Ammo men ro‘yxatga turmay turib, ID karta ololmas ekanman.

Bu masalada yordam so‘rab Chilonzor tuman hokimiyatiga va avval yashagan “Xirmontepa” mahallasidagi rahbarlarga murojaat qildim. Hatto, hokimiyatga benzin olib borib, o‘zimni va bolalarimni yoqaman ham dedim. Ammo hech kim dodimni eshitgani yo‘q.

Chilonzor tuman deputatlariga telefon qildim, bir nechta rahbarlarning eshigini taqillatdim. Ammo hech qanday natija bo‘layotgani yo‘q.

Men ham O‘zbekiston fuqorosiman, menga bo‘lmasa ham ikki norasida farzandimga rahmingiz kelsin. Davolanishim uchun yordam beringlar, yashashni va farzandlarimni o‘zim oyoqqa qo‘yishni istayman. 

Hamma narsa Allohdan dardni bergan shifosini ham o‘zi beradi. Ammo kimdir sababchi bo‘ladi. Ishonamanki, sizning yordamingiz sabab hayotim yaxshi tomonga o‘zgaradi, — deydi bemor Rohatoy Irismatova.

Irismatova Rohatoyga xayriya qilishni istasangiz,

8600 0609 4538 5715 (Irismatova Roxatoy)

Murojaat uchun telefon: +99891 003-61-16