Ijtimoiy tarmoqlarda Chorvoq suv ombori qirg‘oqlarida odam suyaklari aniqlangani aytilgan video tarqaldi. Bo‘stonliq tuman prokuraturasi holat bo‘yicha “Daryo”ga ma’lumot berdi.
Idoraning ma'lum qilishicha, ushbu qirg‘oqda bundan bir necha yillar avval Bo‘stonliq tumanidagi “Bolodala” MFY hududida joylashgan “Bezgati bog‘” qabristoni bo‘lgan. Ushbu qishloqda yashovchi aholi shu qabristonga dafn etilgan, suv omborida suv sathining ko‘tarilishi natijasida qabriston suv ostida qolib ketgan va hozirda suv sathi pasaygani sababli odam suyaklari yuzaga chiqqani aniqlangan.
“Chorvoq suv omborida har yilning boshida suv sathi pasayishi natijasida bunday holatlar kuzatilib turilishi maʼlum bo‘ldi”, — deyiladi prokuratura munosabatida.
Hozirda mazkur holat yuzasidan tuman prokuraturasi tomonidan tergovga qadar tekshiruv harakatlari olib borilmoqda, natijasi bo‘yicha qonuniy qaror qabul qilinishi taʼminlanadi.
Izoh (0)