Sog‘liqni saqlash vazirining tegishli buyrug‘i bilan tibbiyot fanlari nomzodi Maqsud Saidov Bolalar milliy tibbiyot markazi direktori lavozimiga tayinlandi. Bu haqda vazirlik matbuot xizmati xabar berdi.
Vazirlik axborotiga ko‘ra, bir necha xorijiy tilda erkin muloqot qila oladigan Maqsud Saidov tayinlovga qadar 2020-yildan beri Respublika ixtisoslashtirilgan kardiologiya ilmiy-amaliy tibbiyot markazi Samarqand viloyat filiali direktori vazifasida ishlab kelayotgan edi.
Maqsud Saidov 1986-yilda Samarqand viloyatida tug‘ilgan. Saidov Samarqand davlat tibbiyot institutini tamomlagach, 2011—2018-yillarda Rossiyaning akademik A.N.Bakulev nomidagi yurak-qon tomir jarrohligi milliy tibbiyot markazida klinik ordinatura bo‘yicha tahsil olgan.
2015-yildan 2018-yilgacha ushbu nufuzli tibbiyot markazida vrach-kardioxirurg sifatida faoliyat olib borgan. Shuningdek, Germaniya va Belarusning yetakchi klinikalarida malaka oshirgan.
2018-yilda O‘zbekistonga qaytib, Samarqand viloyat bolalar ko‘p tarmoqli tibbiyot markazi bolalar kardioxirurgiyasi bo‘limi mudiri sifatida ish boshlagan.
Eslatib o‘tamiz, Bolalar milliy tibbiyot markazini Toshkentning Yashnobod tumanida 2020-yilda qurib bitkazilgan. Qiymati 130 million dollardan ziyod bo‘lgan mazkur markaz Janubiy Koreya ko‘magida, “Baum” korporatsiyasi loyihasi asosida barpo etilgan. O‘sha yilning may oyid Shavkat Mirziyoyev ushbu tibbiyot markazini borib ko‘rgandi.
Izoh (0)