Toshkentda bu yil bahorda issiq suvni 5 kunga o‘chirish rejalashtirilmayapti
Veolia Energy Tashkent bu yil bahorda issiq suvni 5 kunga o‘chirish rejalashtirmayotganini e’lon qildi.
“Issiqlik tarmoqlarining gidravlik sinovlari keyinroq boshlanadi. Bunda, suvning o‘chirilishi butun shaharda bir vaqtni o‘zida emas, balki kvartallar bo‘yicha amalga oshiriladi”, — deyiladi kompaniya xabarida.
Qayd etilishicha, bunday yondashuv o‘tkaziladigan sinovlar sifatini oshiradi. Mutaxassislarning e’tibori issiqlik tarmog‘ining kichik bir qismiga qaratiladi, ya’ni tekshirish batafsilroq bo‘lib, ko‘proq nuqsonlarni aniqlaydi.
Veolia Energy axborotiga ko‘ra, 5 kunlik issiq suv ta’minotini o‘chirish gidravlik sinovlar (bosim bilan tekshirish) paytida amalga oshiriladi. Ular, boshqa narsalar qatori, quvurlardagi nuqsonlarni aniqlash uchun ham zarur. Nuqsonlarni profilaktik bartaraf etish, isitish mavsumida avariya holatlar sonini kamaytiradi.
Issiq suv kvartallar bo‘yicha o‘chiriladi. O‘chirilishlar haqida rasmiy Telegram-kanalda oldindan xabar qilinadi. Gidravlik sinovlar yoz-kuz mavsumiga (kelgusi isitish mavsumi boshlanishiga yaqin) rejalashtirilgan.
Avvalroq Toshkentda 27-martdan 5-aprelga qadar issiq suv bir kunga o‘chirilishi xabar qilingandi. Veolia Energy xabarida aytilishicha, bir kunlik o‘chirish issiqlik tarmoqlarini mo‘ljallangan harorat bo‘yicha sinovdan o‘tkazish uchun zarur. Ular 2 yilda 1 marta o‘tkaziladi. Mutaxassislar harorat deformasiyasi sharoitida quvurlarning mustahkamligini tekshiradi.
Kompaniya, shuningdek, nima uchun sinovlar o‘tkazilganiga qaramay, isitish mavsumida avariyalar sodir bo‘lishiga izoh berdi.
“Toshkent shahridagi issiqlik tarmoqlar qoniqarsiz holatda. Isitish mavsumida avariya holatlari sonini kamaytirish uchun, biz isitisharo davrda issiqlik trassalari uchastkalarini almashtiramiz va nuqsonlarni bartaraf etamiz. Issiqlik tarmoqlarini bosqichma-bosqich modernizasiya qilish natijasida nuqsonlar soni kamayadi”, — deyiladi ushbu savol yuzasidan berilgan javobda.
