Isroil bosh vaziri Binyamin Netanyaxu mamlakatda keng ko‘lamli norozilik namoyishlariga sabab bo‘lgan sud-huquq islohotlarini muzlatib qo‘yishga qaror qildi, deb xabar bermoqda Haaretz nashri.
27-martga o‘tar kechasi namoyishchilar Tel-Avivdagi asosiy magistralni to‘sib qo‘ygan, Netanyaxuning Quddusdagi qarorgohiga bostirib kirgan. Olomonni tarqatish uchun politsiya maxsus jihozlardan foydalangan.
Sud islohoti tufayli Isroilda umumiy ish tashlash e’lon qilindi. Xususan, Histadrut savdo markaz va fabrika kasaba uyushmasi norozilik bildirish maqsadida umumiy ish tashladi. Ish tashlashga tibbiyot xodimlari, bolalar muassasalari, shuningdek, Isroil turli Adliya vazirligining amaldorlari va ayrim xodimlari qo‘shilgan.
Mamlakatning yirik aeroporti Ben Gurion xodimlari barcha reyslarni bekor qildi. Aeroport faqat havodagi reyslarning qo‘nishiga ruxsat bermoqda.
Sud-huquq islohotlariga qarshi ommaviy norozilik namoyishlari bir necha oydan beri davom etmoqda. Navbatdagi keskinlik 26-mart kuni, Binyamin Netanyaxu hukumat siyosatini tanqid qilgan Isroil mudofaa vaziri Yoav Gallantni ishdan bo‘shatganidan keyin yuz berdi. Vazir mamlakat rasmiylarini islohotlarni to‘xtatishga chaqirgandi. Isroil shaharlaridagi norozilik namoyishlari politsiya bilan to‘qnashuvlarga aylanib ketdi. Bu orada Isroil prezidenti Isxak Gersog hukumatni ommaviy noroziliklarga sabab bo‘lgan sud-huquq islohotini to‘xtatishga chaqirdi.
Netanyaxu boshlagan sud islohoti Oliy sud vakolatlari qonun va hukumat qarorlari bilan cheklanishni, Vazirlar Mahkamasi sudyalarni tanlash ustidan nazoratni o‘z qo‘liga olishini nazarda tutadi. Shunday qilib, biror qonun hatto Oliy sud tomonidan mamlakat konstitutsiyasiga zid deb topilsa ham, parlament uni qabul qilish imkoniyatiga ega bo‘ladi.
Izoh (0)