Toshkent metropolitenida “Zo‘ravonlik — madaniyatimizga begona” nomli targ‘ibot bannerlari paydo bo‘ldi.
Bannerlar Milliy mass-mediani qo‘llab-quvvatlash va rivojlantirish jamoat fondi tomonidan ilgari surilgan Nolalar loyihasi tomonidan o‘rnatilgan. Unda ayol-qizlarning zo‘ravonlik, ularga nisbatan kuch ishlatish vaqtidagi nolalari tushirilgan. Shuningdek, ovoz to‘lqinlari ekvalayzerini anglatuvchi grafik tasvirlar va adras bezaklari uyg‘unlashtirilgan.
Loyiha saytida aytilishicha, bundan asosiy maqsad so‘nggi yillarda o‘zbekistonlik ayollarning zo‘ravonlik qurboni bo‘layotgani haqida media manbalarda tez-tez uchrayotgan yangiliklar fonida unga jamoat joylarida ham e’tiborni kuchaytirish, mavzuni yanada dolzarblashtirish bilan birgalikda salbiy vaziyatlarning sonini ham keskin kamaytirishdir.
Unda ta’kidlanishicha, O‘zbekistonda oiladagi zo‘ravonlik keng tarqalgan bo‘lsa-da, bu haqda kam gapiriladi. Ko‘p holatlarda oilada zo‘ravonlikka uchraganlar turli sabablar bilan bu haqda sukut saqlashga majbur bo‘ladi. Bunday paytlarda ularning nolasiga quloq tutadiganlar juda kam topiladi. Shu sababli ula murojaat qilishi va ko‘mak berilishi uchun ushbu sayt ishga tushirildi.
“Nolalar.com — butun O‘zbekiston jamoatchiligining e’tiborini ayollarga nisbatan zo‘ravonlikdan ogoh bo‘lish, uning oldini olish va asoratlarini yengillashtirish uchun yaratilgan loyihadir”, — deyiladi loyiha saytida.
Izoh (0)