Iqtisodiy tadqiqotlar va islohotlar markazi tomonidan O‘zbekiston soliq tushumlari o‘rganildi. Bu haqda “Daryo”ga markaz matbuot xizmati xabar berdi.
Monitoring natijalari shuni ko‘rsatdiki, joriy yilning fevral oyida mamlakat soliq tushumlari hajmi o‘tgan yilning shu davriga nisbatan 10,9 foizga oshgan.
Jumladan, Jizzax (39,5 foiz), Toshkent (25,7 foiz), Navoiy (23,4 foiz), Samarqand (22,3 foiz) va Andijon (19,4 foiz) viloyatlarida, Qoraqalpog‘iston Respublikasi (21 foiz) va Toshkent shahrida (26,9 foiz) soliq tushumlarining sezilarli o‘sishi qayd etildi.
Soliq tushumlari manbalari kesimida QQS 15 foizga, daromad solig‘i tushumlari 24 foizga, mol-mulk solig‘i 31 foizga va yer solig‘i 18 foizga oshdi, bu esa oy oxirigacha o‘sishni saqlab qoldi.
Avvalroq QQSning 15 foizdan 12 foizga tushirilishi narxlarning tegishli ravishga tushishiga olib kelmagani haqida xabar berilgandi.
QQSning tushirilishi narxlar darajasiga ta’sir etmaganining asosiy sabablari qatoriga quyidagilarni kiritish mumkin:
- Iste’mol tovarlari bozorida xufiyona iqtisodiyot ulushining kattaligi va soliqlardagi pasayishlar rasmiy ishlayotgan firmalarning nisbatan kichik miqdordagi foyda marjasini oshishiga yo‘naltirilishi;
- Bozorlarda tegishli ravishda raqobat muhitining shakllanib ulgurmagani;
- Narxlarga ta’sir etuvchi boshqa asosiy omillar (dollar kursi, qayta moliyalash stavkasi, pul massasi va boshqalar) ta’sir kuchining oshib borishi.
Izoh (0)