Saida Mirziyoyeva Vashingtonda “Tinchlik korpusi” bosh direktori o‘rinbosari bilan uchrashdi 

Saida Mirziyoyeva Vashingtonda “Tinchlik korpusi” bosh direktori o‘rinbosari Tomas Pen bilan uchrashdi. Bu haqda u o‘zining Telegram’dagi sahifasi orqali ma’lum qildi.

Qayd etilishicha, uchrashuvda taʼlim va til o‘rganish bo‘yicha hamkorlik istiqbollari muhokama qilingan.

“Men davlatimiz rahbari tomonidan amalga oshirilayotgan, jumladan, taʼlim sohasidagi islohotlarni qo‘llab-quvvatlagani uchun janob Penga chuqur minnatdorlik bildirdim”, — deb yozadi Mirziyoyeva.

U O‘zbekistonda ingliz tilini o‘qitadigan amerikalik ko‘ngilli o‘qituvchilarning faoliyatini yangilash, jumladan, qishloq xo‘jaligi, sog‘liqni saqlash, AKT va ilg‘or texnologiyalar kabi sohalarda ingliz tilidagi mutaxassislarni tayyorlashga qaratilgan masalalarni hal etishda “Tinchlik korpusi” bilan yaqin hamkorlik qilishi juda muhim, deya hisoblashini bildirgan.

“Ishonchim komilki, bugungi uchrashuvimiz ikki mamlakat o‘rtasidagi do‘stona munosabatlarni yanada mustahkamlashga xizmat qiladi”, — deya ta’kidlaydi u.

Avvalroq Saida Mirziyoyeva BMTning Nyu-Yorkdagi bosh qarorgohida o‘tkazilgan Suv masalalari bo‘yicha konferensiyada nutq so‘zlagani to‘g‘risida xabar berilgandi.