Surxondaryo viloyati Angor tumanida maktab o‘qituvchilari “Open budget”da ovoz to‘plashga majburlanayotgani aytildi. Viloyat prokuraturasi axborot xizmati mazkur xabar yuzasidan maʼlumot berdi.
Unga ko‘ra, ijtimoiy tarmoqlarda Angor tumani, “Novshahar” mahallasida, 36-sonli maktab o‘qituvchilari “Open budjet” loyihasi uchun ovoz to‘plashga majburlanayotgani to‘g‘risida tarqalgan xabarlar viloyat prokuraturasi tomonidan nazoratga olinib, hozirda ko‘rib chiqilmoqda. Shuningdek, prokuror o‘qituvchilarga ovoz yig‘ishga topshiriq bergani yolg‘on ekani taʼkidlangan.
“Xabarda prokuror o‘qituvchilarni ovoz yig‘ishga topshiriq bergani savol ostiga olingan bo‘lib, ijtimoiy tarmoq faollaridan bu kabi yolg‘on axborot tarqatmaslik va tuhmatdan saqlanish so‘raladi”, — deyiladi xabarda.
Avvalroq Maktabgacha va maktab taʼlimi vazirligi o‘qituvchilarga ushbu loyihada ovoz yig‘ish uchun majburiy topshiriq berilayotgani, topshiriqni bajarishga eʼtiborsiz qarayotgan o‘qituvchilarga kerakli chora ko‘rish bilan tahdid qilinayotgani to‘g‘risida xabarlar vazirlik tomonidan jiddiy o‘rganilayotganini ma’lum qilgandi.
Izoh (0)