24-mart kuni Andijon viloyati prokuraturasida bo‘lib o‘tgan matbuot anjumanida Asaka tumani sobiq hokimi Mansur Alixonovga nisbatan Jinoyat kodeksining 5 ta moddasi bo‘yicha jinoyat ishi qo‘zg‘atilgani maʼlum qilingandi. Oliy sudning jamoatchilik va OAV bilan aloqalar boshqarmasi boshlig‘i Aziz Obidov mazkur ish haqida rasmiy axborot berdi.
Taʼkidlanishicha, mazkur ishni Jinoyat ishlari bo‘yicha Paxtaobod tuman sudi ko‘rib chiqqan. Mazkur sudning 2023-yil 27-yanvardagi hukmi bilan M. A. Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi, 205-moddasi (hokimiyat yoki mansab vakolatini suiisteʼmol qilish) 2-qismi “a” bandi, 209-moddasi (mansab soxtakorligi) 2-qismi “a” bandi va 229-4-moddasi (yer berish tartibini buzish) 2-qismi “a”, “b” bandlarida nazarda tutilgan jinoyatlarni sodir etganlikda aybli deb topilib, unga 2 yil muddatga mansabdorlik va moddiy javobgarlik vazifalarida ishlash huquqidan mahrum qilib, 3 yil-u 1 oy muddatga ozodlikni cheklash jazosi tayinlangan.
“Shuningdek, ushbu hukmga ko‘ra, U. S. (Asaka tumani qishloq xo‘jaligi bo‘limi boshlig‘i lavozimida ishlagan) Jinoyat kodeksining 205-moddasi 2-qismi “a” bandi va 229-4-moddasi 2-qismi “a”, “b” bandlarida nazarda tutilgan jinoyatlarni sodir etganlikda aybli deb topilib, unga 2 yil muddatga mansabdorlik va moddiy javobgarlik vazifalarida ishlash huquqidan mahrum qilib, 3 yil-u 1 oy muddatga ozodlikni cheklash jazosi tayinlangan.
Bundan tashqari Kadastrlar palatasi Asaka tumani filiali mutaxassisi lavozimida ishlagan O.Q. ham Jinoyat kodeksining 168-moddasi (firibgarlik) 3-qismi “b”, “v” bandlarida nazarda tutilgan jinoyatni sodir etganlikda aybli deb topilib, unga 2 yil muddatga mansabdorlik va moddiy javobgarlik vazifalarida ishlash huquqidan mahrum qilib, ish haqining yigirma foiz miqdorini davlat daromadi hisobiga ushlab qolgan holda 3 yil muddatga axloq tuzatish ishlari jazosi tayinlangan.
Sudlanuvchilar M.A. va U.S.ning himoyachilari bilan birgalikda birinchi instansiya sudining hukmi ustidan keltirgan apellyatsiya shikoyatlari asosida jinoyat ishining ularga oid qismini Andijon viloyat sudining apellyatsiya instantsiyasida ko‘rib chiqish uchun 2023-yil 30-mart kuniga tayinlangan”, —deyiladi rasmiy axborotda.
Eslatib o‘tamiz, 2022-yilning 27-sentabr kuni Prezident administratsiyasi rahbari Sardor Umurzoqov rahbarligida o‘tkazilgan videoselektor yig‘ilishda yer munosabatlarini tartibga solishga oid qonunchilik hujjatlariga rioya etmagani, faoliyatida yo‘l qo‘ygan boshqa jiddiy qonun buzilish holatlari uchun Mansur Alixonov tuman hokimi lavozimidan ozod etilgandi.
“Asaka tumani hokimi janob Alixonov. Yer ajratish masalasida 56 ta qaror bilan 2 ming 390 gektar yer noqonuniy ajratilgan. 2021—2022-yillarda, bir yarim yilning ichida yer bilan bog‘liq noqonuniy holatlar bo‘yicha 15 ta jinoiy ish qo‘zg‘atilgan. Shuning uchun bugun prezidentimizning qarorlari bilan siz ham lavozimingizdan ozod etilasiz”, — degan edi Sardor Umurzoqov.
Faqat yer ajratish emas, 2021-yilning dekabr oyida Asaka tumani hokimi Mansur Alixonov aholi bilan nomaqbul tarzda suhbatlashgani aks etgan video tarqalgandi. Holat ijtimoiy tarmoqlarda keng muhokamalarga va jamoatchilikning eʼtirozlariga sabab bo‘lgandi.
Mansur Alixonov 2020-yilning sentabr oyida Asaka tumani hokimi lavozimiga tayinlangan. U mazkur tayinlovga qadar Jalaquduq tumani IIB boshlig‘i lavozimida faoliyat yuritgan.
Izoh (0)