UEFA korrupsion ishlar tufayli “Barselona”ni Yevrokuboklardan bir mavsumga chetlatishi mumkin.
Avvalroq kataloniyaliklar 2016-yildan 2018-yilga qadar RFEF texnik hakamlar qo‘mitasi sobiq vitse-prezidenti Xose Mariya Enrikes Negreyraga 1,4 million yevro o‘tkazgani xabar qilingandi. Klub bu bo‘yicha bayonot bergan va Futbol federatsiyasi amaldoriga yosh futbolchilar va hakamlar haqidagi hisobotlari uchun to‘lov amalga oshirilganini ta’kidlagandi. Shundan so‘ng “Barselona” 2003-yildan beri Negreyraga 4,7 million yevro to‘lagani aniqlandi.
UEFA qoidalariga ko‘ra, klublar nafaqat milliy balki, xalqaro darajada ham o‘yinlarga ta’sir o‘tkazish usullarini qo‘llashi mumkin emas.
Aks holda, tashkilot klubni Yevrokuboklarda ishtirok etishdan chetlashtirish huquqini o‘zida saqlab qoladi, biroq bu diskvalifikatsiya faqat bir mavsum davom etishi mumkin. “Barselona” bo‘yicha qaror iyul oyida qabul qilinishi kutilmoqda.
“Barselona” Yevrokuboklardan chetlatilsa, keyingi mavsumda bir necha million yevrolik zarar ko‘radi, deya xabar beradi El Confidencial. La Liganing yangi qoidalariga ko‘ra, kataloniyaliklar endi iqtisodiy dastaklardan foydalana olmaydi. Shu sababli diskvalifikatsiya ular uchun jiddiy zarba bo‘ladi.
Izoh (0)