O‘zbekiston 2023-yilning yanvar—fevral oylarida xorijdan qiymati 719,6 mln dollarga teng bo‘lgan 14 ta samolyot import qilgan. Bu haqda Statistika agentligi xabar bermoqda.
Mamlakat yanvar oyida 13 ta, fevral oyida yana 1 ta samolyot sotib oldi. Sotib olingan samolyotlarning 6 tasi Germaniyaga, 4 tasi esa Litvaga to‘g‘ri keladi. Ularning qiymati mos ravishda 421,7 mln dollar va 66,7 mln dollarni tashkil qilgan.
Qayd etilishicha, fevralda Shveysariyadan 86,5 mln dollarlik samolyot sotib olingan. Bundan tashqari, 2023-yilning ilk ikki oyida Fransiya, Singapur va Buyuk Britaniyadan ham bittadan samolyot sotib olgan.
Ma’lumot uchun, 2022-yilda O‘zbekistonda xalqaro yo‘nalishlarda belgilangan grafik asosida 15 192 ta aviaparvoz amalga oshirilgan. Mahalliy yo‘nalishlarda 6345 ta aviaparvozlar amalga oshirilgan.
2022-yilda xalqaro yo‘nalishlarda bir kunda o‘rtacha 41 ta aviaparvozlar kuzatilgan.
Izoh (0)