2023-yil kult filmlar muxlislari uchun haqiqiy xazinadir. Kianu Rivz nihoyat Jon Uik roliga qaytadi, Xarrison Ford 15 yildan keyin Indiana Jons franshizasida rol o‘ynaydi.
Timoti Shalame — Pol Atreydes
“Dyuna: Ikkinchi qism” ilmiy-fantastik filmi 2023-yilning noyabr oyida chiqishi rejalashtirilgan va bosh rollarda Rebekka Fergyuson, Zendaya va, albatta, Timoti Shalame ishtirok etadi. Qolaversa, Ostin Batler, Florens Pyu va Kristofer Uolken ham bu safar yulduzlar tarkibiga qo‘shiladi.
Rasmiy konspektga ko‘ra, 2-qismda Pol Atreydes o‘z sayohatini davom ettiradi, Chani va Fremen qabilasi bilan hamkorlik qiladi va uning oilasiga juda ko‘p azob-uqubat keltirgan qasoskor fitnachilardan o‘ch olishga kirishadi. Bundan tashqari, u sevgilisi va butun koinotning najoti o‘rtasida qiyin tanlovga duch keladi.
Dayan Kiton – Diana
Film sujeti 40 yil davomida “Kitob klubi”ga tashrif buyuradigan va o‘ta mo‘tadil turmush tarzini olib boradigan, ammo keyin hamma narsani tubdan o‘zgartirishga qaror qilgan to‘rt dugona atrofiga qurilgan.
Filmning davomi 2023-yilning may oyida chiqishi rejalashtirilgan. Bu safar qahramonlar dam olish uchun Italiyaga boradilar. Lekin ishlar rejadagidek ketmaydi, keraksiz sirlar yuzaga chiqadi va ularning dam olishlari hayajonli sarguzashtga aylanadi.
Jeyson Momoa – Akvamen
“Akvamen va yo‘qotilgan qirollik” filmining davomi aynan nima haqida bo‘lishi hozircha maʼlum emas, ammo Jeyson Momoa bosh rolni o‘ynashi aniq.
Umuman olganda, jurnalistlarning fikriga ko‘ra, sujet Akvamenning qaroqchi Qora Manta timsolida umumiy dushmanni mag‘lub etish uchun birlashishga majbur bo‘lgan akasi qirol Orm bilan munosabatlari atrofida bo‘ladi. Film 2023-yil dekabr oyida chiqishi rejalashtirilgan.
Kianu Rivz — Jon Uik
“Jon Uik” blokbasterining 4-qismi premyerasi 2023-yilning mart oyida bo‘lib o‘tishi kerak. Ma’lumotlarga qaraganda, film sujeti 3-qism voqealarining mantiqiy davomi bo‘ladi, unda Kianu Rivz qahramoni persona non grata deb e’lon qilingan va dunyoning eng xavfli raqiblari bilan to‘qnash keladi.
Aytgancha, film rejissori Chad Staxelski franshizaning bu qismi oxirgi bo‘lishi mumkinligiga ishora qildi. Va bu haqda hukm chiqarish hali qiyin bo‘lsa-da, doimiy ravishda yuqori kassa tushumlarini hisobga olsak, filmni o‘tkazib yubormaslik kerak.
Jeyson Steytem — Jonas Teylor
2018-yilning yozida “Meg: Chuqurlik maxluqi” haqiqiy xitga aylandi va munosib prokatni taqdim etdi. 5 yildan so‘ng — nihoyat 2023-yil avgust oyida bosh rolda Jeyson Steytem bilan “Meg-2: Chuqur”ning davomini ko‘ramiz.
Ssenariy “Meg” romanining davomi bo‘lgan Stiven Altenning “Bo‘shliq” kitobi asosida yaratilgan. Garchi lentaning sujeti hali aniq bo‘lmasa-da, bu safar paleobiolog Jonas Teylor megalodondan tashqari boshqa, ehtimol, undan ham xavfli qadimiy yirtqich hayvonga duch keladi deb taxmin qilish mumkin.
Xarrison Ford — Indiana Jons
15 yildan so‘ng, 2023-yil iyun oyida Xarrison Ford o‘ynagan arxeolog Indiana Jons haqidagi mashhur franshizaning uzoq kutilgan 5-qismi chiqadi.
“Indiana Jons va taqdir g‘ildiragi” deb nomlangan yakuniy qism sujeti tafsilotlari hozircha ma’lum emas. Biroq bu Stiven Spilberg ishtirokisiz yaratilgan birinchi film bo‘lishi qiziq. Bu safar rejissor estafetani “Logan”ni suratga olgan Jeyms Mangoldga topshirdi.
Kris Prett — Yulduzli Lord
Uzoq kutilgan “Galaktika qo‘riqchilari”ning 3-qismi may oyida chiqishi rejalashtirilgan. Ushbu lentada Qo‘riqchilar Zabveniyadagi hayotga moslashadi, ammo tez orada yenot Raketaga tahdid paydo bo‘ladi. Piter Kvill do‘stini qutqarish uchun jamoani yig‘ishga majbur bo‘ladi.
Qizig‘i shundaki, 2017-yil aprel oyida rejissor Jeyms Gann mavjud Qo‘riqchilar hikoyasini 3-qism bilan yakunlamoqchi ekanini va 4-qismda yangi qahramonlarga e’tibor qaratmoqchi ekanini aytgandi.
Izoh (0)