AQSH Davlat kotibi o‘rinbosari Viktoriya Nulandning aytishicha, AQSH anneksiya qilingan Qrimdagi Rossiya harbiy obyektlariga Ukraina tomonidan zarba berilishini qo‘llab-quvvatlaydi. Bu haqda u 16-fevral kuni Karnegi markazida onlayn so‘zlagan nutqida ma’lum qildi.
“Rossiya Qrimda ko‘plab harbiy inshootlar qurgan, bular Ukraina zarba bermoqchi bo‘layotgan qonuniy nishonlar va biz buni qo‘llab-quvvatlaymiz. Qrim hech bo‘lmaganda qurolsizlantirilmas ekan, Ukraina xavfdan holi bo‘lmaydi”, — dedi Nuland.
Uning qo‘shimcha qilishicha, urush tugaganidan keyin ham Qo‘shma Shtatlar Ukrainaga harbiy yordam ko‘rsatishda davom etadi, chunki Rossiya mojaroni qayta boshlamasligiga kafolat yo‘q.
Shu kuni Davlat departamentida bo‘lib o‘tgan brifingda ham Viktoriya Nuland AQSH Ukrainaning Rossiya tomonidan bosib olingan barcha hududlarini qaytarish istagini qo‘llab-quvvatlashini aytdi. “Ukraina xalqaro chegaralar doirasidagi barcha yerlarini qaytarish uchun kurashmoqda. Biz ularni qo‘llab-quvvatlaymiz”, — dedi Nuland.
Brifing chog‘ida Davlat departamenti rahbari o‘rinbosari Rossiya urushning bir yili davomida 200 mingdan ortiq odamidan ayrilgani, ular janglarda halok bo‘lgan yoki yaralanganini aytdi. Fevral oyi boshida The New York Times ham AQSH va boshqa G‘arb rasmiylari Rossiyaning yo‘qotishlarini 200 mingga baholayotgani haqida xabar bergandi.
Ukraina rasmiylari Rossiya bilan urush rus qo‘shinlari bosib olingan barcha hududlardan, jumladan, 2014-yilda anneksiya qilingan Qrimdan chiqib ketganidan keyingina tugashi mumkinligini bir necha bor taʼkidlagan. Kiyev vakillari Qrimni qaytarish bo‘yicha harbiy operatsiya o‘tkazishi ehtimoli haqida ham bir necha bor aytgan.
Izoh (0)